Jangan Berdalih

Jangan Berdalih / Unang Marsidalian

Kamis, 11 Okt 2018 

Keluaran 4:10-17

I. Patujolo

Diangka natoras jotjot do mangalehon poda, sipaingot, nasehat na denggan tu angka ianakhon na be, hombar tu ragam ni pengalaman naung dibolus. Asa unang salah angka ianakhon mandalani mamang mangadopi parngoluon na. Manang marsuru lao mangulahon sada ulaon. Alai jotjot do angka natuatua/natoras gabe kecewa, ala so dioloi, dibahen ragam ni sidalian laho manundati parsuruan ni natoras na.  

Sidalian laho manjua sada parsuruan, mambahen kekecewaan, rimas tu na marsuru. 

II. Hatorangan

Turpuk ta bodarion manaringoti parsusuran ni Si Musa laho paluahon bangso Israel sian gonmgoman ni Misir. Debata sandiri do na mamillit hita na porsea di Ibana, ndang rohani Jolma i. Didok Tuhan Jesus Joh 15:16 “Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu.”.

Laos on do naeng idoanta diturpuk ta, dipanjaouan ni si Musa, gabe pemimpin laho paluahon Bangso Israel sian Mesir. Musa marlapatan, “na dibuat sian aek”,

Dinamasa pembunuhan tu angka dakdaknak di toru ni 2 taon, diramoti jala dipalua Debata do si Musa sian namasa i, marhite na binahen ni inana (si Yokobed) si Musa tu bagas sada poti  naung didamari, laos dipeakhon ditopi ni batang aek Nil. Diida boru ni raja Firaun ma poti i, laos dibuat.

Disadari Boru ni Firaun do, na anak Israel do si Musa, alai dipangke Debata do haporseaon ni bangso Misir laho paluahon si Musa. Bangso Misir manghaporseai, batang Nil na mangalehon hangoluan, jadi adong do biar ni roha nasida, ido umbahen ndang dibunu si Musa.

Ndang holan sae disi pandonganion ni Debata, laos inana sandiri do si Yokobed na pasusuhon jala na godanggodang si Musa, dung magodang dipasahat ma tu Raja Firaun. Musa mandapot ragam ni angka parbinotoan dohot bisuk hapistaran saleleng di Istana ni Firaun. Jolma na malo dihata nang ulaon pe (Ptd. Ul. Ap 7:21-22).

Di laon-laon ni ari hira-hira marumur 40 Taon, dina masihol rohana marnida angka bangsoNa , diida ma pambahenan angka soldadu ni Firaun tu dongan sabangso na, laos dibunu soldadui, ala biar ni rohana, laho ma si Musa huta Midian, huta ni sipele begu,. Gabe Buronan. Laos dibuat si Musa ma si Zippora gabe pardihutana, boru ni Jetro, malim ni Midian. Ia ualaonna saleleng hampir 40 taon marmahani biru-biru ni simatuana. Laos ditingki i do Debata manjou si Musa, di dolok Horeb gabe naposona laho paluahon Bangso Isarel sian gongoman ni Mesir.

Jala ringkot do tajaha nian sian ayat 1-9 turpuk on, asa boi idaoanta songon dia do parsuruan ni Debata tu si Musa. Dipatudu Jahowa do halongangan / muzijat tu si Musa. Dipauba Debata tungkot na ditiop si Musa, gabe ulok (ayat 3), disuru Debata do asa disurukhon si Musa tanganna tu  gedekdekna, gabe puruon / kusta, diulahi si Musa muse, gabe malum (ayat 6).

Dijou Debata si Musa, alai songon na manjua jala marsidalian. Biar ni roha ni Musa do na dibahen ibana na gabe sidalian laho manjua panjouan ni Debata. Didok si Musa di ayat 10 “Iale Tuhanku, ianggo ahu ndang jolma parhata ahu..... ai dokdok do pamanganku jala hallang dilangku”.

Sasintong ndang na so boi manghatai manang jolma na ngungu manang na hallang manghatai si Musa. On do hataridaan haunduhon, serep ni roha dohot kejujuran ni Si Musa. Dirajumi ibana kemampuanna jala ditanda do dirina, ndang dihilala ibana hinahansit  angka Hatoban di Misir. 40 taon mangolu di Istana, 40 Taon di tano Midian. Dirajumi si Musa tung mansai bangkol rohana laho mangarahon, marsuru bangso i. Jala dibagasan biar ni roha do si Musa, so tung ditulak bangso i Ibana.

Nang hita pe songoni do, ndang na pola na rajin hita tu ulaon adat, molo ditodo hita gabe parhata, Tontu ta baen do alus manulak asa unang marhata. Songoni do si Musa. Diturpok on, tarida do sikap ni si Musa na manguji dirina sandiri do. Panghataion na dohot Debata, patuduhon bahwa na tutu do Debata na manjou Ibana. Ala ulaon na borat do mangulahon hata ni Debata. Porlu do unduk niroha, haserepon, haringgasan, parsitutuan dohot panandaon diri laho mangulahon hata ni Debata, asa unang mura-mura mandele, mardandi, losok roha, molo jumpang masa hamaolon, parungkilon ala manghatindaghon hata ni Debata.

Debata do na manompa hita, diboto do rohanta, na marsitutu manang marsdialian do hita mangihuton, mangulahon panjouan na tu hita, manang adong do agenda tersendiri dirohani jolma i. Molo jolma mamillit, rupa parduru do na boi idaonna, isarana pardompahanna, hinadonganna, partuturon, hubungan emosional. Ido umbahen jotjot jolma kecewa. Ala ndang diulahon dohot denggan naung pinabangkit nai songon na dihirim rohana.  

Torop do ditingki nuaeng, angka naposo ni Debata, gabe batu partuktuhan tu angka donganna, dihatahon hata ni Debata, ndang diparhangoluhon jala ndang diulahon, Tung mansai ringkot do mangarajumi jala mananda diri dipanjoun ni Debata dingolunta. Tutu do au mangulahon panjouan na tu au on?, manang hu jalo pe panjouaon i asa sangap do au diparsaoanku?, Manang adong do laba na di ahu molo mangulahon panjouaon ni Debata di ahu?. Songon Si Musa na manguji dirina, hita pe porlu manguji ma dirinta be.

Hita saluhutna naung dipillit, Jahowa, dipalua Ibana marhite mudar ni Kristus, manjua manang marsidalian do hita mangulahon panjouan ni Debata tu hita ganup?, Pasu-pasu ni Jahowa i do tabahen gabe sidalian ta? Partingkian do ta bahen gabe alasan?, manang hahurangan di sinaodanganta do na gabe alasan dihita laho manumpahi angka ulaon na denggan?, manang ulaon ta i do na gabe alasan. Torop halak roha pardagingon dohot pasu-pasu ni Debata do dibahen sidalian ndang mangulahon panjouaon ni Debata.

Ia Si Musa ndang partingkian, sinadongan, ulaonna na gabe alasan, alai dirajumi ibana kemampuanna, hadirionna, so tung gabe gagal ulaon Debata diulahon. On do na patut sitiruan, mananda diri, hauduhon dohot serep ni roha diadopan ni Debata laho mangulahon panjaouon i. 

Asa dison do hataridaan ni Pangurupion ni Debata tu si Musa, tung pe dibagasan rimas Debata, ai nunga dipatudu Debata halongangan diadopan ni si Musa na tongtong dope ganggu rohana. Diparade Debata do si Aron, hahanai na gabe dongan saulaon ni si Musa (ayat 14).

Dang dipaloas Debata dibagasan ganggu ni roha, naposo na si Musa. Didongani, dipargogoi diparbisuhi Jahowa do Si Musa. Molo tajaha nangkaning, epistel Yos 1:6-9,”Pir ma Tondim “ nina jahowa do tu Si Josua laho mandongani si Yosua. Songoni do Debata Jahowa mangurupi si Musa, Debata sandiri na mangajari, maniroi dohot managarahon Si Musa laho pasahaton Hata ni Debata, dohot mangalehon gogo laho Paluahon Bangso na sian Misir.

Ndang hita pe angka naung dipilit Kristus gabe siseannai, ingkon dibagasan ias niroha, serep nihora dohot haunduhon do laho mangihuthon Kristus, molo tung pe mangadopi ragam ni hamaolon, parungkilon dohot hasusaan mangulahon hata ni Debata. Didongani Jahowa do angka na pinilit nai. Asa unang hita mangasahon hadagingonta, partingikian, hahurangan di sinadongan, ulaon ta gabe alasan manundati parsuruanni Debata dingolunta on. Ai ganup hita dijou dilehon do tugas na marasing-asing. Alai saluhut nai laho pamuliahon jala pasangophon Goar ni Jahowa  marhitehite angka ulaonta na marragam i.

III. APLIKASI

Marasing-masing do panjouon ni Jahowa tu angka na tinompa nai. Jala debata do na mamillit hita, ndang hea Debata salah mamiliit. Diboto Debata do na dibagasan rohanta i. Torop do Naposo ni Debata gagal mangantusi ulaoan nai, ndang ala ni na so didongani Jahowa, alai ala mangoloi hisap-hisap ni daging na sambing dohot ndang manghaporseai panjouan na tu dirina.

Simson gagal memahami Panjouonna ala holong ni rohana marnida haulionni rupa si Delila, Bileam madabu ala / arta / suap raja Moab, Daud gagal alani haulion si Besyseba, Salomo gagal alani mangoloi pardihutana marsomba tu debata sileban. Yudas gagal alani 30 keping hepeng,

Baliksa tumorop do naposo ni Debata na berhasil ala mangoloi, mangantusi jalan sian bulus ni roha laho mangihuthon dohot mangulahahon Panjounna. Abraham berhasil ala mangoloi panjouan ni Debata ruar sian tano hatubuaanna, jala olo mamelehon Ishak, Ishak, Jakob berhasil ala mangoloi hata ni Debata. Yosep gabe raja di Misir, Ruth mangoloi Debata mangihuthon simatua na si Naomi. Josep dohot Maria mangantusi panjouan ni Jahowa didirina, na gabe dalan tu Kristus di portibion.

Godang do hamaolon na diadopan angka naung pinilit nai, alai roha na marsihohot, na olo dipaimbaru jala diajari Jahowa, ido na mambahen denggan ragam ni angka panghobasioan. Didok Tuhan Jesus, di Mat 16:24 ‘Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu! Saluhutna hita tarjou laho mambaritahon hata ni Debata, ndada holan tugas ni angka parhaldo, alai na porsea di Kristus ingkon do mangulahon tohonon naung dipasahat tu ganup dirina.

Ringkot ta rajumi, respon manang tanggapan ni rohanta taringot tu Panjouan ni Debata di ngolunta. Marsitutu do hita, manang manjua, marsidalian. nunga songon dia pelayanan / panghobasion ta dingolunta on. Ditonga-tonga keluarga, nunga be ta patuduhon panghobasion ta denggan i?, gabe tiruan na denggan do hita diangka ianakhon ta?, di Parsaoran ni Marga dohot parsahutaon si Pamodai manang si Pamolai parsaoran do? Si Parholong manang si Parholang?

Turpukhon paingothon hita asa unang marsidalian laho manjamitahon hata ni Debata dingolunta, marhite parulaon, pangalaho, panghataion, pamingkirion na hambar tu lomo ni roha ni Jahowa. Asa unang dibagasan biar ni roha manghatindanghon Hata ni Debata, Ingkon unduk dohot serep ni roha do na olo mansoadahon hadirion, na olo manaon ragam hamaolon alani mangulahon hata ni Debata dibagasan hasintongan dohot hatigoran. Ndang dipaloas manang dipalua Jahowa angka na porseai molo dibagasan habengeton mangulahon hanaNa, Didongani, dipargogoi diparbisuhi Debata do i. di ganup roha dohot hadirion, roha na marsitutu mangoloi panjouon ni Debata.