Martua ma Na Manghabiari Jahowa

NAS                : Psalmen 112:1-10

THEMA            : Martua Ma Na Manghabiari Jahowa

I. PATUJOLO / PENDAHULUAN

Sude do jolma na di portibion manghirim, managam, dohot mangalului jala mula ulaon asa denggan parngoluonna, jala dapotan hatuaon manang Kebahagiaan. Pola do loja jolmai marpingkir, mangalehon nasa gogona asalma dapot nasida na pinarsinta ni rohana asalma boi martua parngoluonna.

Jotjot do didok manang dihatahon angka dongan namartua i, ima molo denggan parngoluonna, gok sinamot manag arta, torop parngoluonna, denggan angka ianakhonna, jala jolma na terpandang di humaliangna. Jala on do  falsafah parngoluon ni hita Batak, Hamoraon, Hasangapon, Hagabeon. Angka on do pangantusion taringot didok na martua manang na berbahagia. Jala angka on do na pinatupa portibion. Hape sasintongna manag hasangopon, hamoraon dohot hagabeon ni ndang menjamin mambahen ngolu ni jolma i gabe martua manang “berbahagia”. Dia do sasingtongna na mabahen jolma i gabe martua?

Udut tu turpuk , dipaingot par Psalmen hita asa biar mida Jahowa do na gabe mambahen hita martua. Ndang na mandok ndang porlu manang ndang ringkot hasangapon, hamoraon, hagabeon i dibagasan ngolu ni jolma i, alai asa tarida ma parbue ni haporseon ni jolma i marhite hite angka pasupasu i.  

II. Hatorangan / Penjelasan Nas

Adong 2 pangantusion taringot tu “Biar”, na parjolo roha na tahuton. Boasa tahuton?, ala diulahon na salah na so denggan, na marolo tu uhum dohot aturan, jadi mabiar ma di panguhuman i. Na paduahon, ima roha na mamparsangap. Isarana ianakhon pasangapohon natoras na.

Jala pangantusion na paduahon on do na didok ParPslamen di turpuk ta on, asa pasangaphon do Debata dibagasan ngolunta ido halak na martua. Boasa ingkon mabiar jala ingkon pansangapon Debata?, Ala: Biar mida Johowa ido parmulaan ni parbinotoan (Poda 1:7a), Parmulaan ni habisuhon (Psalmen 111:10).

Halak na biar tu Jahowa dapotan jala taruli diangka parbinotoan, hapistaran dohot habisuhon dibagasan ngoluna. Biar mida Jahowa marlapatan mangantusi lomo ni roha dohot aturan ni Debata, ndada holan mangantusi alai diuduti dohot mangulahon hata, aturan, patik manang parenta ni Jahowa.

Jala jolma na mangulahon hata ni Jahowa, on do na sorang dibagasan undungundung manang bagas ni Debata, jala na mian di dolok habadiaonNa (Psalmen 15:1). Angka dia ma na didok mangaluhon hata manang biar mida Jahowa? Psalmen 15:2-5 tangkas patuduhon angka ulaoan na patuduhon biar jala na pasangap Debata jala halomoan ni rohana mangoloi hata ni Debata, ima:

·         Burju jala daulat marpangalaho, mangulahon hatigoran, sintong parngoluonna.

·         Ndang marhata tundal, ndang mambahen hajahotan tu angka dongan dohot sisolhotna

·         Paholang ngoluna sian ulaon hajahaton, radot diangka aturan dohot uhum

·         Ndang masangahon hinadonganna, tulus jala marpangoloi rohana mangurupi angka donganna.

 

Halak na lomo situtu rohana mangoloi hata ni Debata, ido na didok manghabiari Debata jala na martua. Didok Tuhan Jesus di Matius 6:33 “Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna”.

Dibagabahon Debata do tu halak na manghabiari jala na pasangaphon jala na mangulahon hatana hatuaon / kebahagiaan, ima:

• 1.    Pasupasu on ni Debata do ro dipinomparna (ayat 2). Psalmen 37:25 “Dakdanak ahu jolo, nunga pola matua ahu, ndang dung dope huida tartading partigor manang mangidoido sipanganon pinomparna i”.  Taruli pasupasu angka pinomparna ala sai dipodahon tu angka ianakhon roha namanontong mamuji jala na pasangap Debata. On ma bagabaga na parjolo tu angka na porsea, jala mangulahon dohot mangaradoti patik ni Debata.
• 2.    Sinamot manang arta na marlobilobi (ayat 3)
• 3.    Diramoti Debata dinamandalani parngoluonna (ayat 4)
• 4. Gabe Tiruan manang “teladan / panutan” ni angka jolma dingoluna, alani pamabahenanna na denggan jala mangaluhon hasintongan (ayat 6)
• 5.    Dipargogoi Debata alani i ndang mabiar molo masa pe angka parungkilon, hasusaan, sitaonon, manang tung pe  dihasogohon, dihosomi jolma alani haporseaonnai (ayat 7-8)
• 6.    Ngoluna gabe pasupasu diangka donganna (ayat 8). Halak na manghabiari Debata, mangarajumi saluhut na adong dingoluna alani basabasa dohot pasupasu na sian Debata, ala ni rade jala ringgas do rohana mangulahon ulaon asi ni roha dohot mangurupi.

On ma na didok na martua hombar Debata.

III. REFLEKSI

Dijou Debata hita gabe anakNa, dipalua hita marhitehite mudarni Jesus, dipatalup hita manjalo haluaon i. Saluhutnai holan ala ni Asi ni Roha ni Jahowa do tu hita asa unang mago hita. Asa hita pe mangalehon jala rade rohanta manghabiari jala pasapangapon Debata dingolunta.  Mangulahon patik dohot hataNa, jala tarida ma parbue ni haporseaoni di ngolunta ganup ido na mabahen hita martua dingolunta.

Hatuaon na di portibion parsatongkinan do i, alai marsiadu ma hita mangulahon hata ni Debata, asa taruli hita di hatuaon na manontong na sian Debata.

Amin..

St. E. Marpaung-GKPI Segar Rejosari