Asa Gabe Sada Nasida

 Asa Gabe Sada Nasida

Minggu 26 Agustus 2018

Johanes 17:20-23

I.PENDAHULUAN

Sai dihirim jala dimemehon natua-tua tu angka pinomparna asa marsada niroha, unang masa parbadabadaan, manang pargulutan jala olo pataluhon roha molo masa sada persoalan, asa adong hasadaon dohot hinauli ni namarhahamarranggi. Jotjot do dihatahon Umpasa songon on ”Sada songon daion ni aek, unang dua songon daion ni tuak”, “Manimbung rap tu toru, mangangkat rap tuginjang”,“Marsiamin-aminan songon lampak ni gaol, marsitungkoltungkolan songon suhat dirobean”. Tung mansai ringkot dohape hasadon di parngoluon on. Molo tabilangi tu na masa nuaengon, Godang do sursar rumah tangga / parsaripeon ala soadong hasadon ni roha, godang do sega parsaoran / punguan ni marga / parsahutaon holan alani marsiboan roha na be, jala torop do huria gabe maponsa alani na soadong be hasadon dohot holong dihuria i.

Molo ni rajuman, sega pe sada parsaoran boi do i ala, hansit ni roha, mangasahon pingkiran dohot gogona , mangihuthon lomoni rohana sambing manang ambisi, ala ndang tarjalo angka donganna na nidok manang na dipingkiri ibana, gabe diarahan, jala dihara ma angka dongan na asing  marhite na mangulului angka hasalaan dohot hahurangan.  Jala godang do dihajolamaon na gabe Provokator laho pasegahon haulion dohot hadenggannon sada parsaoran baik ditonga-tonga keluarga, parsahutaon, parmargaon nang di huria i.

Adong do halak late rohana molo denggan, molo uli sada parsaoran, na sai managlap paturohon hata, na pabadabadahon, na sai olo manggasipi angka donganna. Senang Melihat Orang Susah, Susah Melihat Orang Senang. Jala on realita parngoluon ni hajolmaon na boi adong diangka parsaoran ta be. Ndada holan i tahe torop do angka jolma si ihuthon Kristus na mangulahon sisongoni. On do tahe na dihalomohon Jahowa?

II.PENJELASAN

Diringkot ni  hasadon i, tarlumobi diangka na porsea/huria, ido na gabe tangiang pangongondioanon  ni Jesus Kristus. Jala tangiang na diturpukon laho patuduhon HAMALIMON NI KRISTUS. Bindu 17 on boi do bagionta tu 3 bagian: 1) Taringot tu panghobasion Kristus diportibion, jala on do na gabe panimpuli andorang so tarsilang Ibana  (Ay. 1-5), 2)Manangiangkon angka Sisean (ayat 6-19), 3)Mangangiangkon angka na porsea tu Kristus dung diparatat barita nauli (ayat 23-26).

Tangiang pangondianon ni Kristus di bagian na patoluhonon, ima na patuduhon pandinganion ni Jahowa diangka naporsea dipudian ni ari (ayat 20), dinamarsuru Jesus tu angka sisean i asa marbarita nauli tu liat portbion. Jala sahat do i tu hita ditingki nuaeng, ala hita do parbue ni angka parbarita nauli dohot evangelish na ro tu Tano Batak. Jala tangiang ni Kristus i, manontong do i sahat tu haroro na na paduahalihon.

Asa on do na porlu sirimangan ta  Boasa diharingkothon Jesus manangiangkon asa sada angka na porsea i? (ayat 21),Asa marhite hasadon i do na patuduhon, na manghatindangkon na Jesus i do na marsuru, jala hataridaan i ulaon ni Kristus i marhite hasadaon i do.

Alai, Molo tabilangbilangi ma ditingki si nuaengon, tung mansai torop do aliran ni angka huria. Aliran arus utama ima katolik, protestan, metodis, calvinis, anabaptis, pentakosta dll. Na marsaing-asing angka dogma, doktrin dohot pangajarion.  Na sada mandok aliran na do na sintong, na asing mandok ndang adong tubu haporseaon dihuria na asing, asing ni huria nasida, na sadanari mandok  ndang sah molo tardidi holan di percik dohot lan na asing. Di Indonesia adong PGI, PGPI, PGLII. Didia do sasintong na tarida hasadaon i. Molo ganup angka huria mandok huriana do na sintong. Songon naung pina andar dipamuhai, torop do huria jongjong ala perbedaan pendapat, ambisi dohot hansit ni roha. Ndang Debata dibahen marhuaso alai holan lomo ni rohani jolma i na ma dipangke jala mangatasnamahon Debata.

Didok Tuhan Jesus ditangiang nai”asa gabe sada nasida”. Tontu ringkot do hita mangantusi, aha do umbahen pola didok Asa Gabe Sada, na marlapatan naung adong hian do keterpisahan / parsirangan. Parsirangan ni jolma i dohot Tuhan i. Sian mula na dijadihon Jahowa portibion dohot nasa isina dibagsan haulion dohot hadengganon do. Alai ala ni roha ni jolma na parjolo i na mangihuthon lomo no rohana sambing naeng sarupa tu Jahowa, jala rohani jolma i do na diida sibolis laho pangkeonna maniriang jolmai sian Jahowa. Jadi manang ise na sai olo mambahen sega sada parsaoran na mangurupi sibolis do i, ala ido ulaon ni sibolis.

Ragam do dibahen Debata ala ni holong na laho paluahon dohot pasadahon jolma tu diriNa alai ndang berhasil, Dilehon do uhum alai ndang boi diula jolma i, ditongos do angka Panurirang alai ndang ditangihon, diuhum pe nasida tongtong do mangulahon dosa. Jadi dosa i do na manirang Jolma dohot Debata. Jogal niroha dohot sifat pemberontakan mangalo Debata do na dipinatudu jolma i.

Ido na umbahen Jahowa sandiri na ro tu portibion dibagasan Jesus Kristus AnakNa, dipatutoro diri dohot hasangaponNa, mambuat rupa ni jolma, disumeahon do dirina marhite hamamateNa, asa Jesus sandiri do na gabe Pelean Pardamean ni Jolma dohot Debata.

Asa marhite hamamate dohot hananaek ni Kristus i do na gabe Inti ni Haporseoan i. Jala marhite haporseaon di Kristus do na gabe dalan na padamehon, na pasadahon Jolma dohot Debata. Jala hasadaon ni Kristus dohot Debata tarida sian Holong na pinatupa Na. Disumehaon jala dipelehon do diriNa, asa malua jolma i sian dosa.

Dibagasan tangiangNa dilehon Kristus do hamulaion dohot hasangapon na tu angka na porseai (ayat 22). Aha do na nidok na dison na gabe hasangapon?. Molo diportibion hasangapon do dilului jolma. Ala marhite hasangapon i do, gabe ditanda jolma ibana. Alai ndang on na gabe hasangapon di angka siihuthon Kristus. Didok Tuhan Jesus nasa managihuthon Ibana, disoadohon ma dirina, diporsan ma sialang na diiaban dungi diihuthon ma Jesus. Mamorsan silang ni Kristus / menderita oleh karena iman ido na gabe hasangapon diangka na porsea. Ai ido na pinatuduhon  Kristus dihaunduhon ni rohaNai laho manobus dosa ni Jolmai, na dipalea, dihinsaki, ditijuri, dipasatap. Jala tanda ni Hamulaionna i di na hehe Ibana.

Nang ido na dipangido Tuhan ta asa dibagasan parsitutuon hita mangihuton Ibana, tung pe alani haporseaon ta i, ingkon manaon hita diragam ni angka parungkilon, hamaolon dihinsaki, dipalea-lea hita, dipadao hita hita sian angka parsaoran, dipaburukburuk hita ala mangulahon hata ni Debata jala unduk rohanta tu Debata, dung sahat ditingkina dipahehe ma hita ala haporseaon tai, ala habengetoh ta, ido na gabe hasangapon dihita ala dipaloas jala parsidohot do hita manaon ala ni Kristus, Ndang dipaila jala ditogu, jala dipasingkop Debata ngoluna ima jolma na marsitutu mangulahon ulaon ni Jahowa, sahat ro tu angka pinompar na (Psalmen 37:23-26)

Tung mansai maol do i na mamorsan silang ala ni haporseaon tu Kristus. Ido na pola didok Tuhan Jesus, asa Ibana dibagasan jolma i asa sempurna. Kesempurnaan do na pinagido ni Jahowa. Asa dison ma hataridaan ni ulaon Tondi Parbadia. Ai Tondi i do na Mangajari, Mangapuli, padengganhon na porsea i asa mangulahon habadiaon dingoluna. Jala dilehon do Tondi I tu ganup na porsea. Alai jotjot do suara ni Tondi i ndang ditangihon jolma i. Dilaosi. Ala ni ido umbahen maol jolma i mangolu dibagsan habadiaon i. Porlu Mamanda diri, ise do hita diadopan ni Jahowa, jala haunduhon dohot haserpon ni roha do dalan asa Tartangihon Hita sura ni Tondi i, Butuh Usaha dohot Proses na berkelanjutan . Ndang songon na mambalik tangan. Di Pauli hita dibagasan haimbaruan siganup ari, saleleng mangolu diportbion.

Godang do hamaolon siadopan laho badia, alai molo Tondi i do na tapalaos mangula, mangajari hita sai diPaingot na do hita molo naeng tartondong ta ulaon na sala. Asa dibagasan Proses menuju habadiaon i do gabe taruli di Kesempurnaan. Jala Habadion ni parngaluon i do na gabe sarat asa boi sada dohot Debata, ai Na Badia do Jahowa.

Tangiang Pangandiaonon Ni Tuhan Jesus, on do na patuduhon Holong Na tu jolma i.

III. APLIKASI

Asa on do naingkon ulahononta marhite turpukhon ima :

1.    Diharadeon ni roha Tuhan Jesus na martangiang tu saluhut Jolma na porseai, on do na porlu dihita, asa ndada holan dirinta sambing manang na ringkot dihita sitangainghonnonton alai angka dongan pe ringkot do ni tangianghon.

2.   Hasatiaon dohot parsitutuon ma hita mangihuton Kristus, Unang ma Hasangapon portibi tujuan ni ngolunta, alai las niroha ala parsidohot hita manaon haporsuhon na mamorsan silang i ala Haporseaon ima na gabe hansagapon diangka na porsea.

3.   Mansai ringkot do diangka na porsea mangantusi Visi dohot Misi ni Kristus ro tu portibion. Visi ni Kristus ima patuduhon Holong na Polin (Agape), Misi ni Kristus ima paluahon Jolma sian gonggoman di Dosa. Saluhutna nunga be digenapi. Jala nunga dilehon tugas tu angka na porsea i, ima asa marbaritaa nauli. On do na porlu asa sadalan ngolunta tu ulaon / visi/misi ni Kristus i, asa hita pe dibagasan haringgason dohot roha na marsitutu laho marbarita nauli, jala hataridaan na marhite ngolunta siganup ari, Parroha holong, na gabe sira dohot panondang, siboan dame, lambok jala marlambas niroha songon na tarusat gi Gal 5:22 i. On do na gabe bukti na mangula do Kristus dingolunta.

4.  Sian dirinta do parmulaan ni hasadaon i, ima dikeluarga ta be. Saroha sapingkiran na marsaripe mambahen na denggan di keluarga, ndang be pahata-hata hahurangn angka ianakhon, hahaanggi, na martondong, na martetangga. Ingkon rade mangajari asa tu lam dengganna molo adong an hurang, jala tarbuka rohanta lae diajari molo hita do na hurang. Hasadaon i tarida sian parulaon, ndang holan dihata. Asa dibagasan haringgasaon parsitutuon dohot haunduhon ni roha mangido pangurupion dohot pangajarion. gogo sian Jahowa, marhite Tondi Parbadia asa torus berusaha mangolu dibagasan habadion jala margogo mangulahon hataNa

5.   Holong do na pinatuduhon ni Kristus na dipelehon diriNa, jala ndang dipaingotingot be hasalaan, hahurangan ni jolma i Nang ido na porlu asa dapot hasadaon diangka na porseai, tarlumobi hita na sahuria, asa unang holan hahurangan ni dongan dibilangi, hasalaan ni dongan gabe pargasipan, ai, saluhut na do hita hea mambahen sala, mardosa, Alai ingkon ma nean hita olo paulihon, paingothon, pasingothon asa adong hamubaon. Molo taida donganta madabu, tarrobung ala ni persoalan na so boi diselesaihon, unang ma tapasombu ingkon lehononta do roha, mangurupi asa on on do hataridaan Holong na Polin i. Ndang alani silehonlehon bersifat materi na gabe patuduhon holong. Ingkon boi do hita na sahuria on rap manghilala molo hurang didonganta, hahuranganta ta doi. Unang gabe dohot hita manjehehon, unang gabe hita na pailahon, na pahatahatahon. Ai namarhamaranggi do angka naporsea di Kristus. Melintas suku, budaya parmargaon, dohot paradaton.

6.         Songon Tondi Parbadia na mangurupi hita huria na, nang hita pe asa talehon rohanta laho mangurupi dohot pamajuhon, padengganton hurianta on, marhite pamujian dohot peleanta asa tarida ma visi ni GKPI ima Huria Na Melayani bukan untuk dilayani,  jala 2018 digoari do taon dihurinta ima Membentuk Citra Positif GKPI, asa dison ringkot hasadaon ni roha.

7.    Molo tung pe adong angka perbedaan dipangantusion, pandapot, na so singkop dihilala rohanta dohot na diulahon dongan, unang ma i gabe dalan laho patubu angka parbada-badaan, dingolunta dohot dihumaliangta be, Alai asa perbedaan i na gabe parsiajaran asa adong roha na na padengganhon, na marsilehonan roha dohot roha na ringgas marsiajar mangulahon hadengganon, hataridaan ni hasadaan ni roha do i.

8.   Marragam angka huria di angka parsaoranta be, marragam dogma, doktrin, ritual ibadah, pangajarion asa unang i na mambahen hita terpisah, alai tarajumi ma na gabe sada hamoraon na pinatupa ni Jahowa laho marsomba Ibana. Asa unang olo hita paroaroa huria na asing, na so sa aliran dohot hita. Alana Belum tentu saya lebih benar dari mereka, belum tentu saya lebih kudus dari mereka. Belum tentu saya lebih baik dari mereka. Asa dia na boi gabe tiruan isarana panghobasion, hasadaon mangulahon dohot haringgasan  ima ta tiru.

9.       Asa taruli dihasadaon dohot Debata, ringkot do hita mananda jala patutoru dirinta  marhite haserepon ni roha, mangulahon Hasadaon dihumaliang tabe, Mangolu Dibagasan Habadiahon laho manuju Kesempurnaan. Asa haporseon di Kristus, holong na sian Kristus dohot  Pangkirimon di Kristus, on do na pasadahon hita di parsaoran ta be rap dohot Debata. 

St. E. Marpaung