Matius 21: 28-32
Mangoloi dohot Mangulahan Hata Ni Debata
dalan Laho Mangolu di Dalan Ni Jahowa
Patujolo
Ndang pola maol antusanta
situasi na digombarhon Tuhan Jesus di
turpukta bornginon marhite umpama na pinasahatna taringot pangalaho dohot
parulaon nia dua ianakhon maradophon parenta ni Natorasna asa mangula di Porlak
Nasida.
Nang hita pe, molo tung pe
ditingki sinuaeng on gabe natoras hita tu angka ianakonta be, hita pe ianakhon
do di natoras ta pe. Jala pangalaho dohot parulaon na diumpamahon Tuhan Jesus,
molo ta okkui do, hita pe olo do mangulahon sisongoni. Jadi ndang pola heran be
hita molo diulahoan angka ianakhon ta tu hita natorasna ditingki sinuaengon.
Ta aloi do pangidoan manang
parsuruan nia natoras ta, hape ndang taulahon. Manasai lambok do alus, jala
tung manghirim do natoras ta, ala ndang ta ulahon. Ujungna gabe paro rimas
manang muruk. Naotaras dohot ianakhon rap marhansit ni roha. Ditingki na asing,
olo do hita manjua/manolak parsuruan ni natoras ta, alai dung tapingkiri gabe
olo hita mangulahon, ipe tong do rimas natoras dimulanai.
Hatorangan
Ala ni i do disungkun Tuhan Jesus
dia do naundenggan?, Laos dialusi natoropi ma, anak na manjua alai diulahon.
Molo ta pamanat ndang diangkupi Tuhan Jesus alus nasida i, gabe asing do
dihatahon Tuhan Jesus, ima angka na mangulahon dosa i (sijalo beo, boru na jahat) do na bongot tu
harajaon ni Debata dang angka Parise i. Boasa boi songoni?,
Asa dapot hita lapatan / arti di
turpukhon, ringkot do ta jaha mulai ayat 23-27, Asa antusannta ma boasa tung di
bahen Tuhan Jesus umpama taringot tu 2 ianakhon. Ala angka siboto surat dohot
Parise manungkun taringot Huaso ni Jesus manang ise do Jesus i sasintong na.
Ala ni i disungkun Jesus ma nasida taringot tu pandidion na pinatupa ni si
Johanes. Laos ulaon ni Johanes i do na gabe dasor ni Tuhan Jesus laho patuduhon
huaso dohot patandahon ise do Ibana
Di Ayat 32 di patorang Jesus do,
ia ualon ni Johanes na manjouhon angka pardosa asa tardidi ima dalan habonaran
tu martudutudu tu Tuhan Jesus. Alai ndang dijalo manang ditulak roha ni angka siboto surat / Parise do
panjaouan ni Si Johanes asa tardidi nasida. Halak Parise dohot siboto surat, ima
angka jolma naung timbo, godang jala bagas pangantuasion taringot tu hata ni
Debata na tarsurat di Bukku Patik (Taurat) si Musa dohot buku Panurirang, jala nunga diguruhon
mulai sian ompu nasida.
Bukku Patik
dohot Angka Panurirang manurirangkon taringot tu haroro ni Kristus i. Alai ndang dihaporsea i Halak Parise/Siboto
Surat, tung pe nunga ida nasi da Kristus, Ditulak jala sai dilului nasida do hasalaan
ni Kristus asa adong dalan nasida laho manangkup Jesus. On ma gabe gombaran anak
na manjanghon hata ni Tuhan i alai ndang marparbue, ndang diulahaon na nidok ni
Patik i. Holan pamangan na sambaing mangoloi do Hata-I, hape roha nasida dao, ndang
dihaporseai hata ni Tuhan i. Ala ndang dihaporseai, gabe manjua/manulak ma
mangulahon.
Baliksa,
dihaporseai angka pardosa i do Kristus, diturpukon
ima angka jalo beo dohot boru na jahat. Dijanghon nasida Jesus Kristus
i do Tuhan na gabe dalan tu haluaon, disiala
haporseaon nasida i, ungkap roha nasida jala mangoloi digokhon na pinasahat
Johanes asa tardidi. Gabe taruli ma roha
ma nasida, dijalo nasida haluaon na pinatupa Tuhan Jesus.
Hatararidaan na ima di epistel Naung tajaha nangkin sian Joh
4:21-26,”na dijanghon boru Samaria i do Jesus Kristus (Boru Samaria Ima
gombaran boru na jahat).
Songoni nang si Sakeus (Sijalo beo- Lkas 19 : 2-10), dung dijangkon Tuhan Jesus di bagasna, gabe ungkap
rohana laho mangurupi angka napogos dohot manggonti/paulakkon siopat lompit tu
angka na diangati na hian. Adong
hamubaon ni roha dung dijanghon Tuhan Jesus. Ido umbahen didok Tuhan Jesus,
gabe jumolo do bongot angka pardosa na manjanghon Kristus dingoluna, na
marhamubaon dohot rade mangulahon hata dohot Patik ni Kristus i. On ma gombaran
anak na manjua / manulak dimulana i dung manolsoli dirina, gabe diulahon
parsuruan ni amana i.
Refleksi/sipahusorhusoron
Bagas situtu do pangajarion ni
Kristus marhite umpamai, jala Marhite turpukhon disungkun do dirinta ganup
taringot tu pangoloion ni roha dohot parualonta. Asa sian Umpama i, hita do gombaran ianakkon
na 2 i. Ai dinaung tardidi hita, nunga be dijanghon hita gabe Anak ni Debata.
Jala nunga dilehon tu hita ganup parenta laho mangulahon hata ni Debata ima
uhum dohot Patik Na. Boa do hita, tutu do naung taulahon?, manang gabe manjua
do hita?
Asa marhite turpukhon, boi ma
putihon mutiha ni umpama ni Tuhan Jesus, hombar tu parngoluon ta be, ima:
1. Mangoloi Tuhan i ido dalan asa mangolu didalanNa,. Ringkot do hita
manghaporseai na tahaporseai i. On do pamuhai. Ala torop do halak Kristen, si
ihuthon Kristus, pamanganna sambing mandok Na porsea di Kristus, alai roha dohot
parulaonna tung dao do sian pangajariaon ni Kristus. Holan ditingki gok las
niroha, dapot angka na pinarsinta tung luar biasa do panindangionna, alai dung
masa hamaolon, parungkilon pintor sumurut, mandele, mandao sian Tuhan i, ndang
olo be marsaor rap angka naporsea di huria i.
2. Ndang singkop molo holan na porsea, alai ingkon marparbue. Asa boi
marparbue, ingkon do mangulahon hata ni Debata. Asa boi mangulahon ingkon adong
serep ni roha. Asa marhite haserepon niroha do, tarula hita parsuruan i. Ala dibagasan roha na sisongoni, ndang adong
be roha na manenganengahon diri, na mangasanghon huaso, gogo, hamoraon,
hasangapon, dao jungkat roha, hosom, lambok marroha, pantun pangalahona.
Saluhut na adong didirina dirajumi jala diparhatopot rohana, holan uli basa,
silehonlehon dohot pasupasu ni Debata dingoluna, naingkon pangkeonna tu ulaon
na denggan. Didok ma on anak na mangoloi hata dohot mangulahon parsuraon ni Tuhan i.
Ala Torop do halak na targoar halak na
porsea, alai marginjang ni roha ala sinadongan, ala godang pambahenanna. Roha
sisongoni ma na manulak/manjua panjouon ni Kristus.
3.
Natoras
gabe tiruan na denggan ditongatonga keluarga. Ama na marsuru ianakhon tu balian
i, gombaran pangajarion ni ama tu ianakhon, asa olo mulaulaon. Ra, molo
sinungkon ianakon ta be, ise do tokoh favoritna na gabe panutan/tiruan, mungkin
molo pe dialusi ndang natoras i be na gabe tiruan / teladan/ panutanna. Boasa
boi songoni?, Ala torop angka natoras ndang be marningot dohot mangulahon padan
parsaripeon naung diundukhon.
Natoras do na gabe uluan dikeluarga. Ditingki tardidi ianakon, diundukhon do na mangoloi
mangajar hakristenon tu ianakhon dohot mangarahon asa ondop tu
parmingguon. Di na malua sian
panghangion hita dilehon do tu hita hata sipaingot na gabe bohal ta laho
mandalani pangoluonon, hape ndang taningot be, boa ma hita laho mangulahon i,
ai so taingot. Di na hot ripe hita, tong do dipasahat hata ni Tuhan laho
mandalani Parsaripeon i, alai tong ma tahalupahon. Gabe manjua/manulak hita.
Ndang tahaporseai dohot taparhatopot hata ni Debata naung dilehon tu hita i.
Ala ni i, asa marlambok ni roha ma hita manjalo hata na sinuan ni Debata tu
bagasan rohanta, ai ido na paluahon tondinta, asa gabe siulahon Hata i ma hita,
unang holan pananginangi (Bnd Jak 1:21-22)
4.
Turpukon
mangidohon Asa Marroha Pangoloi ma hita dihata ni Tuhna i, jala rade rohanta mangulahon
parsuruon i marhite haserepon ni roha. Ai parulaon na sisongonon do na
patudohon halak Na Mangolu di Dalan ni Jahowa. Amen
