Saut Ma Lomo Ni RohaM

Kamis Putih, 18 April 2019

Lukas 22:39-46,

Saut Ma Lomo Ni RohaM

 

I. Patujolo

Adong dua porlak na sangat berpengaruh tu pardalanan ni ngolu ni hajolmaon, tarlumobi dihita halak Kristen, siihuthon Kristus. Tontu sungkun-sungkun do hita porlak na dia i?,

Porlak na parjolo, ima porlak Eden, porlak nauli gok hasonangan dohot las niroha, saluhutna nunga diparade Jahowa tu Jolma na parjolo i. Alai ndang marhamonangan Jolma na parjolo i mandalani pergumulan na masa i, di nadilaosi Patik dohot uhum ni Debata, asa ndang jadi panganonna parbue ni hau na ditonga ni porlak i, alai hinorhon ni mangihuthon lomo ni rohana sambing naeng sarupa tu Jahowa gabe mangoloi di pangle-ela ni sibolis, raja ni saluhut hajahaton. Na marpangkhor hadabuan ni jolma na parjoloi tu dosa. Upa ni pangalaosioni ima hamatean, dungi du uduti tu hasusaan ni parniahapan ni jolma i laho mandiori ngolu siganup ari, dohot manubuhon jolma. Tung pe songoni, tong do dihahaolongi Jahowa Jolma i, pola do dibahen jala dipauli Debata bobak bahen abit nasida. Jala dibagabagahon Debata do haluaoan songon hata ni Debata di 1 Musa  3:15 “Jala bahenonku ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulna.  

Porlak na paduaohon,  Ima porlak Getsemani, na gabe turpuk dibornginon. Boasa dohonon gabe berpengaruh tu ngoluni angka na porsea?, Ala diporlak Getsemani do Tuhan Jesus mangaopi parungkilon / pergumulan, na mansai dokdok, laho pasauthon ulaonNa di portibion paluahon jolma sian ihot-ihot ni dosa dohot lilianan ni portibion. Jala dison ma parmulaan ni haganupan dohot panggohi baga-baga ni Debata na dipaujung marhite hamamateNa di hau pinorsinalangi, dohot haheheonNa. On do na patuduhon holong na polin na sian Debata laho paluahon Jolma sian nasa dosa.

 

II. HATORANGAN

Gombaran Porlak Getsemani, di na martangiang Tuhan Jesus, laho pasahothon diriNa tu Ama i, ndada laho patuduhon hagaleonNa tung pe di dok ”Amang, aut olo ma Ho nian pasalpuhon siinumon on sian Ahu’, alai na laho patuduhon holan Jahowa do na tuk laho manesa dohot paluahon Jolma sian dosa.

Si Inumon i, ima gombaran rimas ni Jahowa. Nunga dibahen Jahowa dalan laho paluahon jolma, marhite Patik dohot ragam ni pelean situtungon alai ndang adong na singkop ala saluhut na do mardosa jala ndang adong na dapot pujian ni Debata nasida (Rom 3:23). Ala ni i, ingkon Jahowa sandiri do marhite Jesus Kristus, Debata na gabe Jolma, na maninggalhon hamuliaonNa pola Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana (Filp 2:7), alai ndang adong dosa didiriNa. Holan na Badia jala na so mardosa do na boi paluaohon na mardosa.

 Ido lapatan ni Pandohan” Amang, aut olo ma Ho nian pasalpuhon siinumon on sian Ahu”.  Ndang adong jolma na boi manginumi, ndada holan Jesus sandiri do. Laos on do na patuduhon roha pangoloion, umbahen na diuduti mandok “Alai unang ma rohangku saut, roham ma”.

On na patuduhon perbedaan Porlak Eden Dohot Getsemane i. Jolma na parjolo i di Porlak Eden Mangoloi dohot mangihuthon rohana sambing na marajung tu dosa, alai Tuhan Jesus di Porlak Getsemani, mangoloi jala unduk tu Ama i pasauthon ualaon ni Ama i marhite Kristus, na marujung tu haluaon.

Saluhut na masa di Porlak Getsemani, ima gombaran na nyata diparngoluon ni Jolma. Ulaon na mansai borat do, dohot bernit na gok parungkilon do laho mangihuthon Jahowa, manghatindangkon, mangulahon patik dohot uhum ni Debata. Jala tung arga doi.  Saluhutna jolma berusaha menghindara hangalutan, parungkilon dohot hamaolon dingoluna. Alai ndang na boi tarpasiding, ingkon sidalanan doi, ingkon iunmon do i. Mangihuthon Jahowa, ingkon olo do mandalani Proses naung ditontuhon Jahowa, songon Kristus na mangoloi Jahowa, Alai unang ma rohangku saut, roham ma.  On do na ringkot sisuanonthon tu rohanta.  Tung tangkas do diturpukhon dipaboa Jahowa dalan laho mangadopi parungkilon na mansai boarat dingoluon tarlumobilaho mangihuthon Ibana.

1. Martangiang

Martangiang ma hamu, asa unang bongot hamu tu bagasan pangunjunan!.(ay 40, Ay 46 Gabe ninna ma mandok nasida: Boasa ma tung modom hamu? Hehe ma hamu martangiang, asa unang hamu bongot tu pangunjunan!

Pola dua hali dipaingot Jesus angka sisean i asa martangiang, jala dungo boasa ? ai na girgir do nian tondi i, alai gale do ia daging! roh memang penurut, tetapi daging lemah (Mat 26:41). Dison do ringkot ni tangiang tarlumobi molo adong siparungkilhonhon.

Molo Mangadopi parungkilon mangasahon gogo ni pingkiron, huaso dohot botohon, ndang na taruli i tu hadengganon, mura do i tarela gabe madabu tu pangunjunan do ,tu hasesega na do.

Alai boha ma sipata molo nunga ponjot pingkiran na boi lupa do martangiang, ala didok roha nian, disi adong parungkilon i, laos hatiha i adong dalan haluaon. Disi male, adong sipanganon, disi mauas, rade siinumon, disi sompit, pintor adong napalumbanghon.

Ndang adong na instan, butuh proses, asa on do na ringkot mangadopi parungkilon/ hamaolon i, ima penguasaan diri, hapantason roha (Bisuk/kebijaksanaan), asa dibagasan tiur ni parrohaan dohot tio ni pingkiran laho mangarajumi dohot mangaranap tu angka na masa i. Ai ndang adong gunana Nang pe holsoan ho Tangiang do dalanna Asa taruli ho. (BE 279:2).

Laos on do na ni ondolhon diturpuk on, Asa sai jumolo mangasahon Jahowa marhite tangiang ta, mangidohon gogo mangadopi ragam ni hamaolon i. Jala tandap do dipatuduhon Tuhan Jesus dinamartangiang Ibana tu Ama i, pasahathon parungkilon Nai laho manesa dosa ni Jolmai.

Marhite tangiang ta tu Jahowa i do, naeng hailalaan ta pangurupion ni Debata dohot pangajarionNa tu hita mangadopi parungkilon i. Ido na dipataridahon Jahowa marhite na disuru suru-suruan i margogoihon Tuhan Jesus dibagasan tangianNA. Asa gabe hasomalan dingolunta na martangiang i. Sada panindangion sian Apostel Paulus di Rom 12:12c “Jugulhon hamu ma tangiang”.  Laos on do na pinatuduhon Tuhan Jesus, pola do songon mudar na himpal na  madekdek hodokna. Roha na marsitutu martangiang. Tangiang do sinjata mangadopi hamaolon, tangiang do dalan mangido pangajarion sian Jahowa laho mangantusi na masa i.

 2. Haunduhon dohot roha namarpangoloion , Alai unang ma rohangku saut, roham ma! tetapi bukanlah kehendak-Ku, melainkan kehendak-Mulah yang terjadi."

Nunga diajarhon tu hita marthite tangiang hatopan i, “Sai saut ma lomo ni rohaM, du..”, na patuduhon dohot mangondolhon ndang adong huaso manang gogo di didirinta, holan Jahowa do na marhuaso mangalehon gogo.  Jotojot do jolma i, mandok ndang dialusi tangiangna, ndang dioloi Debata pangidoanna.

Ala na dipangido holan laho papuason rohana sambing. Hape mangolu pe hita holan ala basa-basa dohot asi ni roha Jahowa do.

Boasa ringkot haunduhon dohot roha na marpangoloion dinamartangiang?, Asa on do na patuduhon na marhaporseaon na tutu hita holan tu Jahowa, jala marhite i do tubu ma dihita pangkirimon na mangolu. Molo pe songon na soadong alus ni tangiang ta dihilala rohanta,ndang pintor sumurut, alai tardok hita ma Debata do na umboto na ringkot i diparngoluonkon.Tidak menjadi kecewa karena tidak diberi,  alai tongtong marpanghirimon.

3. Rade jala Jaga dohot Roha na marpanarion (berjaga-jaga dan Hati yang perduli)

“jadi tarpodom ma nasida didapot, dibahen arsak ni rohanasida.”,  Nunga dipaboa Tuhan Jesus tu angka siseanNa aha nanaeng siadopanNa, alai ndang jaga nasida, gabe tarpodom ala habot ni roha, sai hira na so perduli tu Tuhan Jesus.

Jotjot do ala sitaonon dohot hamaolon mambahen arsak ni roha, ndang diboto mangalului dalan haruarna, gabe tarpodom, mandele, ndang adang na perduli tu hamaolon i.

Jotjot do hata “marsitaon bungkuk na be ma ruar sian pamangan ni jolma i”. Tung ringkot jala arga do keperdulian / marpanarion tu angka dongan na marungkil. Holan manangihon holso ni roha pe boi do palumbanghon.  Asa rade rohanta laho  managianghon dongan, dalan patuduhon holong ni roha tu angka dongan na dibagasan parungkilon, Asa diurupi jala dipargogoi Jahowa mangadopi parungkilon. 

 

III. REFLEKSI

Tagiang, ima sinjata  diangka naporsea. Tagiang ima dalan pasahaton hamaulieteon ni roha dohot haporseaon dipangaramotion dohot pandonganion ni Debata. Marhite tangiang do hita mangidohon na ringkot diparngoluonta.

Ala ni i, Ta jugulhon ma na martangiang, Halak na margogo si partangiang i. Ndang talu .ala ni sitaonon. Dibagasan tangiangi do dapot pangapulion dohot pangurupion ni Debata, Jala tongtong marhaimbaruon dipanghirimon, ala dihaporseai jala haposanNa do Tuhan i, na tuk paluahon sian hamaolon dohot parungkilon. Tuhanta do na mondangi hita. Yak 5:16b “Doa orang yang benar, bila dengan yakin didoakan, sangat besar kuasanya. Na margogo situtu do tangiang ni partigor, molo dihaburjuhon. Amen

Pnt. E. Marpaung