Berilah Keadilan Kepadaku, Ya Allah / Luluhon ma ahu ale Jahowa

Kotbah Minggu Judika, 07 April 2019
(Berilah Keadilan Kepadaku, Ya Allah / Luluhon ma ahu ale Jahowa)
Psalmen 25:1-7
Hidup Dalam Kasih Setia Tuhan / Mangolu Holan Asi Ni Roha
 
I. Patujolo
Molo tapaihut ihut hata ni Tuhan Jesus di Epistel naung tajaha minggu sadarion, tangkas do didok Tuhan Jesus di Joh 15:15, Ndang be anak somang goaronna, alai nunga dipanakkok gabe ale-ale nama digoari  angka na niasiannai. Hata on laho patuduhon sada hubungan na mansai rosu (intim/solhot) antara Jahowa dohot angka na porsea i, ndang adong be batas  manghatai dohot Debata.  Tangkas do pandohan ni Kristus, ianggo anak somang ndang diboto aha na ni ula induk somang na jala adong biar ni roha , alai molo na marale-ale diboto do aha na gabe diulahon dohot direncanahon donganna, adong sikap na roha na marpangantusi on.
Ndang sude halak boi gabe ale-ale. Adong do na boi halan gabe dongan sambing, alai sumurung do anggo ale-ale i. Holan tu ale-ale i do olo hita pasahathon na ponjot dibagasan rohanta, ale-ale i do na olo mamodai manang mangalehon semangat molo adong persoalan, jala tung dijagai do unang sanga hansit roha ni ale-ale na i. Nang pe mardongan saripe di tonga-tonga keluarga, asing do ale-ale ni ama, asing do ale-ale ni ina.
 
II. Hatorangan
Jala on do na dipatudu Raja Daud / parpsalmen di turpukhon sada parsaoran na mansai rosu / solhot, na marale-ale, na pinatuduhon Raja Daud disihol ni rohana tu Jahowa dibagasan tangiangna. Di Ayat 1 “Ho do, ale Jahowa, dihalungunhon rohangku.”,  Lungun dihilala roha Raja Daud, ala adong na nanaeng hatahononna tu Jahowa. Taringot parungkilan manang parsorion manang adong sipingkiron na mansai borat, na mambahen gale tondi nang pamatang i. Dipatudu Raja Daud pos ni rohana ai holan Jahowa do na tuk mangurupi ibana mangadopi hamaolon i.
Molo tarimang rimangi, ndang adong be nahurang di Raja Daud. Raja do ibana na manggomgom Israel na pinilit ni Jahowa, gok do huoso na di bangso i, jala di ibana do hamoraon i, dohot hagabeon i. Lengkap do di Raja Daud, angka na sinangkapan ni jolma i Hasangapon, Hamoraon nang Hagabeon. Nda ingkon marhasonangan ma ibana ? Alai boasa do Ibana marungkilsongon hita? Molo diparngoluonon, nda olo do jolma i mangapian marnida donganna naung singkop dihamoraon, hagabeon nang hasangapon? Sai hira ndang adong be siparungkilonna molo ni ida simalolong, sonang jala marlas ni roha ma ngoluna ima na tubu dibagsan rohani na marnida.  
Marsiajar hita sian turpukhon, Saluhut Hamoraon, Sangap nang Hagabeon hape ndang boi laho pasonanghon dirina. Boi do hamoraon i manuhor Istana na megah, alai ndang bi manuhor las ni roha, boi do hamoraon manuhor obat na arga, alai ndang hasehaton, boi do hamoraon i manuhor buku na arga alai ndang parbinotoan. Ndang margogo Ibana mangadopi persoalan na i, holan Jahowa do na gabe ingananna mangaluhon saluhut parsorion nai. Jahowa do gabe ale-ale na. Tung Pos do rohani Raja Daud na so pailaon manang dipaurak ibana ditonga angka musuna.
Jalo ondo na patuduhon parsaoran Raja Daud  narosu (solhot) tu Debata, ala dirajumi saluhut na adong di Ibana, na sian Jahowa do, jala Jahowa do na tuk paluahon ibana sian na parsorion i.
 Turpuk on mangajari hita holan asi ni roha dohot denggan basa ni Jahowa do na boi paluaohon hita sian angka parsorion dohot hamaolon ni parngoluon on, jala ringkot do dihita dibagasan roha na bulus, na tulus mangarajumi ise do hita diadopan ni Jahowa.
Ndada holan na pasahaton parsoarion na, alai diuduti Raja Daud do ditangiang na mangidohon Pangurupion dohot pangajarion sian Jahowa laho mangatusi angka sangkap dohot dalan di Jahowa jala asa dibagasan hatigoran dohot hasintongan Raja Daud mangulahon mamang mambahen sada keputusan taringot siparungkilon na i, jala on do na patuduhon asa dipargogoi Ibana dingoluna. (Ayat 4-5” Ale Jahowa, sai pabotohon ma tu ahu angka dalanmu, jala ajarhon tu ahu angka bogasmu. Sai togutogu ma ahu tubagasan hasintonganmu, jala ajari ahu, ai Ho do Debata ni hatuaonku, Ho do na huhaposi ganup ari.).
Ragam hamaolon diparngoluon on na taadopi. Marhite turpukhon ndada asa parungkilon ni na mambahen hita gabe gale, sumurut haporseaon i, alai songon raja Daud na mangidohon Gogo, pangurupion dohot pangajarion sian Jahowa, asa hita pe , tapangido ma gogo , pangajarion ni Jahowa  asa lam mangantusi  mangadopi hamaolon na masa ,i dibagasan hasintongan.
Dipaloas Jahowa do ragam ni parungkilon ro tu hita, asa lam jonok do hita tu Jahowa, ala halak na porsea do hita, ndang songon angka na so mananda Jahowa, pintor didok do parungkilon i na sada uhuman.
On do na mambedahon angka na porsea di Kristus dohot na so porsea molo mangadopi parungkilon. Jala marasing do parbue na. Molo halak na porsea mangida parungkilon i, asa mambahen solhot dirina tu Jahowa jala pa-tang-hon  haporseaonna, jala boi idaonna songon dia huaso dohot tangan ni Jahowa mangula, ala dirajumi saluhut na masa i manumpak tu na denggan do, jala saluhutna denggan doi ditingkina.
Alai molo naso porsea, baliksa gabe sada uhuman, jala laos madabu tu pandelean na bagas, lam dao sian Debata.
Tangiang ni Raja Daud, ditTurpukhon on  tung mansai singkop, ndada holan na pasahothon holso ni rohana dohot mangido pangajarion sian Jahowa, alai dipangido iabana do hasesaan ni dosa. Jala diliturgi siganup minggua tontong do dipatupa mangidohon hasesaan ni Dosa sebagai bagian ibadah.
Ayat  6-7 Sai ingot ma, ale Jahowa, angka denggan ni basam dohot asi ni roham, ai sian na robi do angka i.Sai unang paingotingot angka dosa ni haposoonku dohot pangalaosingku, sai ingot ma ahu, ale Jahowa, hombar tu asi ni roham, ala ni denggan ni basam.
Dirajumi, diranapi dohot dihilala Raja Daud do hasalaan dohot dosa na nasailaon, ditingki haposoon na. Boi ma dohonon, Psalmen on disurathon Raja Daud dung lam matua umurna. Diingot Raja Daud do hasalaanna ima na ditingki dibuat si Batsyeba gabe pardihutana, hape ia siBatsyeba ripe ni Uria, jala dibahen Daud do Rencana pamatehon Uria marhite na disuru Uria marporang.  
Ndada holan i, ianakhon na si Absalom pe mangulahon na so denggan mambunu angka anak ni Raja, dosa perzinahan  (pangalangkupion), saluhut na i dietong Daud do on hasalaan na sebagai natoras. On do na mambehen Raja Daud gabe mabiar dohot ganggu rohana mida angka musuna, ala gabe sada hailaan bolon doi molo diboto angka musunai.
Dibagasan hibul dohot serep ni roha do Raja Daud mangidohon hasesaan ni dosana, na porsea do Raja Daud na parpamuati roha ni Jahowa mida dosa dohot hasalaanna, boi pe ibana mangolu jala marhagogoon holan ala asi ni roha dohot denggan ni basa Jahowa sambing. Dirajumi Raja Daud do ndang marpansohotan holong dohot asi ni roha ni Jahowa tu jolma i, di paima Debata do hamubaon ni roha dohot hamumulak na tu Jahowa. Jala on marhadomuan tu panghatidangkonon ni Parpsalmen i sandiri di Psalmen / Mazmur  103:8 Parasi roha jala pardengganbasa do Jahowa, lambat tarrimas jala parasi roha godang.
Ndang holan Raja Daud na mangadopi sisongoni, ndada holan ala ni faktor ekonomi na mambahen hita gabe marungkil, alai persoalan na sangat menyita tingki dohot pingkiranta ima persoalan na terjadi ditonga-tonga parsaripeon/keluarga. Pangalaho ni ianakhon na so mangoloi hata / poda ni natorasna, KDRT, dlna jotjot do manegai roha nang haporseon ta. Marhite turpukhon, diajari hita asa mangidohon pangurupion dohot mangidohon hasesaan ni dosa tu Tuhanta dibagasan  hibul dohot tulus ni roha, jala marhaundukhon tu Jahowa, ala Jahowa do na boi maniroi, manorangi, mangajari hita asa malua sian hamaolon i.

          III. Refleksi

Hombar tu minggunta sadariaon ima minggu Judika na marlapan, Luluhon ma au ale Jahowa (Berilah keadilan kepadaku Ya Allah), jala tema minggunta : Mangolu holan sian asi ni roha ni Jahowa, adong piga hal na boi uhalon ta laho bohal ni partondionta mangadopi parngoluon on.

1. Sangap, hinadongan dohot hagabeon diportibion ndang boi paluahon sian ragam angka parungkilon dohot las ni roha na manontong, holan dibagasan Jahowa do adong haluaon, dohot las ni roha na manontong. Psalmen 118 : 8-9 Dengganan marhaporusan tu Jahowa, asa marhaposan tu jolma. Dengganan marhaporusan tu Jahowa, asa marhaposan tu angka raja.
   
2. Ndang dipaila jala dipaurak angka jolma na porsea na sai tongtong marhaposan tu Jahowa
3. Dipaima Jahowa do hamubaon ni roha ni jolma na niasiannai, mulak tu Jahowa maninggalhon dosa na.
4. Hamaolon diparngoluon, dipangke Jahowa laho mangajari hita pasolhothon diri tu Ibana dohot dalan manghamulaitehon pasu-pasuna dingolunta. Marhite angka parsahiton, lam ta antusi arga ni hahipason, marhite na mauas hita lam ta antusi arga ni santetek aek na pasombu uas, marhite na male siubeon ta antusi tabo ni sipanganon.
5. Asi ni roha, holong dohot denggan ni basa Jahowa Sambing do na pangoluhon jala na paluahon hita sian dosa marhite mudar ni Kristus, ndang ala ni gogonta dohot ulaonta, manang pambahenanta.
6. Ala ni dipangido turpukhon hita asa dibagasan haunduhon, dohot hasatiaan manghaporseai Jahowa, manang aha pe hamaolon na ta adopi. Ala disi do tarida huaso dohot holong ni Jahowa na mangula dingolunta.
7. Hata ni Debata na Margogoihon hita, tajaha ma “Roma 5:3 Alai lumobi sian i dope, ai itahalashon do nang angka haporsuhon, ala taboto, dihorhon haporsuhon i do habengeton ni roha. 5:4 Jala dihorhon habengeton ni roha i do hatauon, jala hatauon i do mangkorhon pangkirimon.5:5 Alai ndang na murak hita bahenon ni pangkirimon i, ala nunga diusehon tubagasan rohanta holong ni roha ni Debata marhitehite Tondi Parbadia, naung nilehonna i tu hita. / Dan bukan hanya itu saja. Kita malah bermegah juga dalam kesengsaraan kita, karena kita tahu, bahwa kesengsaraan itu menimbulkan ketekunan, 5:4 dan ketekunan menimbulkan tahan uji dan tahan uji menimbulkan pengharapan. 5:5 Dan pengharapan tidak mengecewakan, karena kasih Allah telah dicurahkan di dalam hati kita oleh Roh Kudus yang telah dikaruniakan kepada kita. 

                    Jesus Kristus i do ale-alenta na sumurung. 

                    Dipargogoi Jahowa ma hita mangulahon hata na i.  Amen

                    Pnt. E. Marpaung