Jesus do Batu Parsuhi / Jesus Kristus adalah Pondasi

Kamis, 28 Maret 2019

Markus 12:1-12 

Jesus do Batu Parsuhi / Jesus Kristus adalah Pondasi

I. Patujolo

Hombar tu parumpamaan na pinatupa Tuhan Jesus di Turpuk ta on, masa do i di parngoluon ni hita. Hita na mangaranto tu Tano Melayu on, ta tadinghon do huta hatubuantamanang bona pasogit. Torop do halak batak nampuna tano parbagianan di huta hatubuanna. Situasi na so memungkingkan laho mangula tano darat manang hauma i, dipasomalma di pasewahon tu dongan tubuna mamang keluarga na na tinggal di huta. Alai jotojot do gabe masa parbadaan dung ro tinggina naeng mangido sewa manang gogo ni hauma na niula ni jolma i, ragam ma dibaehn alasan asa unang dilehon sewa na i. adong ma na mandok, gagal do panen na sida, haleon potir, hona ambolas. Sai hirasa so adong be mararga nampunasa i. Ujung na jut ma roha nampunasa, gabe dipasahat ma tu na asing mamang digadis. 

II. Hatorangan

Laos ido naeng idaonta diturpukhon, na gabe sipaingot, soso-soso di hita angka na porsea. Sungkun-sungkun dihita marhite turpukhon : Aha do Na Gabe Porlak Anggur ni Debata? Ise do hita sasintongna di adopan ni Debata?, Marhuaso do hita ngolunta?, Boi do hita manambai ganjang ni umurta?.  Alai jotjot do ndang disadari jolma i saluhut hadirion na, huaso na, hamoraonna, hasangaponna, hagabeon na on do na gabe dipasangahon jala di etong alani gogona sandiri. Dihilala rohana angka hinadongan dohot huaso na boi paganjang umur na, boi mambahen las roha na. Ndang disadari saluhutna ala ni Uli basa, Asi ni roha dohot pasu-pasu na sian Debata. Jala molo ro angka na marholong ni roha na paingothon gabe tubu penolakan didirina, apalagi molo diida na pasahothon barita nauli i, na paingothon dirina tumoru sian dirina, tumoro di hasangapon, hagabeaon dohot sinadongan. Pintor ro do hata Ise ho?, urus ma jo dirim unang urusan ni halak urusi!. Apalagi molo songon na koras hata ni Debata manginona tu dirina gabe dietong do songon na manggurui. Ndang dilaapati hata ni Debata laho paulihon, laho patinghoshon, lao mangajari asa mangolu dibagasan hasintongan.

Mangalusi sungkun-sungkun naung pinasahat di ginjang i. Debata do nampunasa porlak anggur i. Debata do nampunasa portibion, Ibana do na manjadihon hita, Ngolunta on do na gabe Porlak Anggur ni Debata, jala hita sandiri do pangulai. Ringkot rajumanta ise do hita sasingtong na. Na soadong hape huaso manang gogonta laho mangula angka siulaon molo so dipargogoi Debata, molo so didongani Debata, molo so dipasu-pasu Debata.

Ayat 1, tung tandap do dipabotohon, Jumolo do Jahowa manarihon na ringkot i diangka na niasian na I. Dipauli do Porlak i, na marlapatan diparade Jahowa aha nanaeng siulahonon ni jolma i, ima marhite ulaon ta na marragam mi, hombar tu Sangkap dohot  lomo ni RohaNa, na gabe dalan parngoluan siganup ari. Dibaehen do Handang ni Porlaki, na marlapatan pangaramotion dohot pandonganion ni Jahowa dingolunta laho mangula ulaon ta, jala na padaohon hita sian ragam ni angka hajahaton nanaeng manggulut, mambolgak, mambuat naung ta ula i. Saluhutna i ta jalo do i molo mian hita dibagasan “Handang/parik ” naung pinauli ni Jahowa i.  Unang ruar, manimbil manang ta buka handangi.

Dipauli do gudang na ima inganan ni Hasil ni porlak ina marlapatan manontong do disarihon Jahowa ngolunta. Sahat ro di na ubanon, tongtong donganon ni Jahowa, RamotanNa dohot sarihononNa. Jala marhadomuan do on tu Hata ni Tuhan Jesus di Matius 6: 34” Antong, unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.

Ndada holan pasupasu na ringkot na diparngoluon na pinasahat Debata tu hita, Naumbalaga jala naumarga Ima “ Pasupasu Haluaon na Pinatupa Debata Marhite Jesus Kristus, naung mate Tarsilang ala ni pangalahonta, dosanta, pangalaosionta humonghop hita”.  Kristus do na gabe Batu Parsuhi, Batu Mamak, Ojahan ni Haporseonta (Ayat 10 ).

Batu Parsuhi do na manontuhon kekuatan dohot rupa ni sada bagas manang bangunan. Ditaon Tuhanta Kristus ragam ni Hamaolon dohot parungkilon laho manghophop hita. dibagasan hasatiaan dohot roha na mangoloi, jala unduk tu Parsuruan Ni Jahowa do na diulahononNa, Asa i pe gabe marhamonangan do Tuhanta manaluhon huoaso ni Portibion.  Nunga ta jalo Parbue ni i marhite haporseonta. Naeng hita pe, molo pe mangadopi ragam ni hamaolon, ala ni haporseaonta, ala ni parngoluon, parsaoran, ditulak hita ala manghatindanhon hasintongan na sian Jahowa. Unang pintor sumurut rohanta laho mangihuthon Jesus Kristus. Nunga dibasahabashon tu hita Batu Parsuhi ni Haporseaonta Ima Mudar ni Kristus, ingkon ma taparhaseang i, lam tu togu na ma hadirion ta, haporseaon ta dohot manghirim hita mangulahon ulaon naung dipasahat Jahowa tuhita hombar tu Panjouon ni Debata tu hita ganup marsada sada. Unang be hita tarlalap dibagsan pandeleon molo tung pe humasusa parngoluon ta, alai tongtong ma tubu roha na marpanghirimon mangido gogo sian Jahowa asa margogo mandalani, mandiori na ringkot diparngoluoni, ala saluhut na nunga diparade sian mulana dihita.

 

III. REFLEKSI

Tontu molo tarajumi do, Na Debata no na pangoluhon hita, na manirohon na ringkoti diparngoluon ta, na mangaramoti ngolunta, na mamasumasu ulaonta dohot basa-basa ni haluaon marhite Kristus na Gabe Batu Parsuhi ojahan ni haporseaon ta, ndang adong be di rohanta laho manulak hata manang parsuruan ni Debata.

Marhite Turpuk ta dibodarion, tung  boi do idaonta lambas ni roha ni Debata mangida saluhut pambaehan di jolmai, ndang holan sahali disuru angka na poso na, alai marulak loning do, asa marhamubaon tumadinghon dosana, songani hatana di Psalmen 103:8 Parasi roha jala pardengganbasa do Jahowa, lambat tarrimas jala parasi roha godang. Hezekiel 18:23 “Tung tagamon * marlomo ni roha ma ahu mida hamatean ni parjahat i, ninna Tuhan Jahowa; nda tagonan nian, molo muba rohana i sian dalanna angka na sai laon, asa mangolu ibana.

Ringkot ta hilala songoni ma Debata paihutihut parngoluonta. Binsan dilehon dope hita mangolu, sehat dope pamatang dohot pingkiran ta, margogo dope hita, ta tangihon ma panjoun ni Jahowa marhite naung Diigil, dipangido jala diparar Debata dongolunta, haporseaon ta , hadirion ta, asa marparbue di ngolunta.

Songon dia do hita menanggapi on?. Torop do jolma nunga didai nauli, na denggan dibagsan ngoluna, alai tongtong marsidalian laho mangulahon ulaon ni Debata. Jotjot alus Ndang adong tingkingku, Ringkot dope tu diringku, Ndang sanga dope ahu?. angka hata sisongoni ido na pataridahon penolakan disungkun-sungkun di Debata di na diparar Ibana, ngolunta baen ula-ulana laho marbarita nauli.

Asa unang songon naung dibariton diturpukhon, diangka pangula naung mandai ragam ni pasupasu sian porlak i, gabe dipingkiri laho mangarajai. Asa hita pe unang ma pasu-pasu ni Debata marhite hinadongan,  hamoraon, hasangapon, jabatan ido na gabe mangarajai Parngoluonta, alai tarajumi ma saluhut naung dipasahat Jahowa ndang ala ni gogonta, haburjuonta, holan asi ni roha Jahowa Sambing do i, ta okkui ma huoso dohot gogo ni Jahowa.

Dipaingot hita Asa unang sala hita mamangke Pasu-pasu ni Jahowa i, Dilehon dihita ragam ni Pasu-Pasu asa gabe pasu-pasu diangka humaliangta marhite-hite naung dipasu-pasu Debata hita dingolunta. Molo diparar Debata pe ngolunta taon gabe ula-ulaNa, sihamuliatehonon do i, ala dipangke Debata do ngolunta laho pararthon dohot mambarithaon  Huoaso, Holong dohot Hata Na di ngolunta.  Nunga Ta jalo Kristus, na gabe Ojahan di Haporseaonta. Naingkon songon Batu Parsuhi i, na gabe hajongjongan ni sada bagas na uli tung pe ndang tarida i. Hita pe naingkon gabe Songon Batu Parsuhi i diparngoluonta, tung pe ndang ditanda manang ndang dietong halak ngolunta, alai gabe parsidohot ma hita gabe parsuhi na gabe hajongjongan parsaoran na uli dohot denggan na hinalomohon ni Debata dalan ta manghamulaitehon saluhut denggan ni basa dohot pandonganion ni Jahowa di ngolunta. Debata ma na mandongani hita. Amen

            Pnt. E. Marpaung