Marlas ni Roha Ma Hita Marsomba Tu Debata

Natal Seksi Pria, 20 Des 2019

Marlas ni Roha Ma Hita Marsomba Tu Debata

(Matius 2:10-11)

 

Huria ni Tuhanta,

Dengganan do turpukon molo tajaha mulai sian ayat 1, asa taboto, ia turpukon manaringoti haroro ni angka parhapistaran sian purba. na ro marsomba tu Jesus.. Ise do nasida ?, Parhapistaran na sian Purba ima  (Orang-orang Majus, yaitu orang-orang bijaksana yang memiliki pengetahuan tentang ilmu falak/ilmu perbintangan, ahli astrologi),

Hatutubu ni Kristus gabe sada barita na balga, barita las ni roha ala marhite na ro Ibana tumiru rupa ni jolma gabe doshon jolma, ido  dalan pasauthon sangkap ni Debata Jahowa paluahon jolma sian gomgoman ni Dosa.

Jumolo do barita i dipaboa Debata marhite surusuruanNa tu angka parmahan na adong di Betlehem Efrata. Tontu boi ma tardok hita, angka parmahan i ima halak Israel sandiri.

Jala Gabe barita na bolon do hatutubu ni Kristus, ala ndang holan angka parmahani na ro marsomba tu Jesus, alai diarahaon Debata do roha ni angka halak Majus i (parhapistaran sian purba na somananda Debata), ro marsomba tu Jesus, Asa Angka Parhapistaran na sian Purba i, dipangke Debata gabe Sipanindangi (Menjadi Saksi) hatutubu ni Kristus. Hasintongan (Kebenaran) sada barita, nda ingkon adong minimal 2 halak na manaksihon mamang sipanindangi?

 

Huria ni Tuhanta,

Dung diida halak Majus, tanda Bintang i, hombar tu parbinotoan nasida, Ima tanda haroro/hatutubu sada Raja di huta Juda. Tung mansai dao do pardalanan nasida, sian tano Median di Persia tu Betlehem di Tano Israel, holan naeng marsomba tu Jesus.

Asa dung sahat nasida tu Jerusalem, dijumpangi nasida do si Herodes, manungkun didia do Raja na tubu i. Gabe tarsonggot ma herodes dohot pangisi ni Jerusalem, ala ni i di jou Herodes ma angka siboto surat dohot Farisi manungkun taringot na barita na  dipasahat angka Parhapistaran sian Purba i.

Laos dipabao Angka siboto surat dohot Parise na di Betlehem do haroro ni sipalua i hombar tu hata ni angka Panurirang. Tung pe dihatahahon nasida hata ni angka panurirangi, alai tong do ndang porsea angka Parise dohot siboto surat i.

Jadi dung diboto angka parhapistaran na sian purba i didia huta Betlehem, borhat ma nasida, marhite Bintang i na gabe sulusulu nasida. Dung sahat nasida jala bongot tu bagas i, diida nasida ma Jesus, laos dipasahat nasida ma pelean tanda las ni roha, tanda balga ni roha nasida marnida Jesus ima angka sere, haminjon dohot angka na angur (emas, kemenyan dan mur), 

 

Huria ni Tuhanta,

Hombar tu Tema ni Natal Seksi Pria hurianta “Marlas ni Roha Ma Hita Marsomba Tu Debata”, sub tema “Marhite Perayaan Natal Seksi pria, Rade Jala las ma rohanta mambahen na dumenggan laho pasangaphon Tuhanta Jesus Kristus”,   Aha do na boi sipeoponta manang na gabe parsiajaran di hita Marhite Angka Parhapistaran na sian Purba (Orang Majus dari timur) angka na so mananda Debata, na ro marsomba tu Jesus.

 

1. Barita haluaoan dipasahat tu saluhut bangso

Ndanda holan parmahan na di Efrata na marlas ni roha, alai dohot do angka parhapistaran na sian purba taruli las ni roha bolon, ala jumpang jala diida nasida Si Palua i, ima Jesus i. Songoni do nang hita, marhite angka pambahenan angka Evangelish na ro tu Tano Batak marbarita nauli 160 taon naung salpu, hita pe gabe parsidohot marsaulihon haluaon na pinatupa ni Kristus.

Disiala ni i do ringkot do hita mangarima jala mangarajumi nunga songon dia ngolu ni haporseaonta. Adong do las ni rohanta mangihuthon Kristus? Tarlumobi di partingkian sinuaengon, diragam ni angka hamaolon na taadopi, tutu do ta haporsea i Kristus i na tuk paluahon hita?

 

2.Ndang siida bohi Debata.

Dipangke Debata do angka parhapistaran na sian purba (Halak Majus/na somananda Debata) gabe Sipanindangi / Saksi, haroro ni Jesus di Portibion. Na marlapatan, saluhut na tinompa ni Debata, pangkeonNa do laho mambaritahon hamuliaon, holong dohot huaso na manang pasauthon sangkapNa di portibion. Tarlumobi ma hita naung ditobus Kristus, nunga dijangkon Kristus hita gabe siseanNa. Songon dia do hita mangalapati manang menanggapi panjouon ni Kristus di ngolunta siganup ari? Tutu do hita gabe sitindangi / Saksi Kristus dingolunta ?

Asa marhite tema ni jamitanta bodarion Dipangido asa haradeon jala las ni rohanta laho mangulahon na denggan pasangaphon Kristus.

 

3. Haporseaon ingkon do marniula (Iman harus diperjuangkan)

Parhapistaran na sian purba (Halak Majus dari timur), ro sian huta na di  Midian /Persia, holan naing mangida / pajumpang dohot Jesus, hombar tu haporseaonna. Dalan na sidalanan nasida tung mansai dao, gok angka hamaolon, alai ala ringkot ni roha naeng pajumpang dohot Jesus, sude angka hamaolon ni ndang gabe pangambati dilangka nasida laho manomunomu Si Palua i, Tuhan Jesus Kristus. 

Pangalaho na pinatudu ni Angka Parhapistaran na sian Purba i na boi gabe tiruan dihita dina laho mangulahon Haporseaon tu Tuhan Jesus. Tutu gok do angka hamaolon, parungkilan, tantangan din laho manghajongjonghon Haporseaoan i.  Ragam angka pangambati na ingkon siadopan dinananeg patuduhon manang manghatindanghon Haporseaon i. boi do ro angka pangambati i ro sian dirinta sandiri, sian keluarga, manang sian angka na asing. Alai marhite haporseaoanta na sai tongtong manatap tu Jesus Kristus, saluhut angka pangambati i, ido na gabe dalan laho pa tang haporseaonta. Marhite angka pangambati i do, tubu ma dihita roha na serep, roha na tongtong mangidohon pangurupion sian Debata. Asa sian roha na unduk, na serep ido na patubuhon pangkirimon. 

Disiala ni i, molo pe rongom angka haamaolon, hasusaan i di ngolunta, unang  ma pintor mandele, mandate rohanta, lam tapadao sian parsaoran na badia dohot Debata., alai ingkonma lam ta pajonok, lam ta pasolhot, ta tingganghon ma saluhut na borat dingolunta holan tu Jesus Kristus. Tahaposi ma Ibana, ai Ibana do na tuk paturehon, paluahon dohot patudu dalan asa malua hita sian ragam ni hamaolon i.

 

4. Pelehon ma na dumenggan (Persembahkan yang terbaik)

Tung tandap, bagas do pangantusion angka parhapistaran na sian purba i taringot tu hatutubu ni Jesus. Ido umbahen diboto nasida angka dia nanaeng sipasahathonna tu Jesus, ima Angka pelean na arga, dohot na denggan. Ido diparade jala nanaeng sipelehonon ni nasida tu Jesus, Ima Sere, Haminjon dohot angka na angur/na hushus (Emas, Kemenyan dan Mur). 

Asa marhite angka Pelean i, disi ma hataridaan ise do Jesus sasintong na, dohot angka nanaeng siulahonanonna di portibion.

• Sere / Mas, na patuduhon Hamoraon, Hasangapon, Hamuliaon na mewakili lambang ni Harajaon. Jesus do Raja diatas segala Raja. 
• Haminjon / kemenyan, dipangke angka malim/imam di bagas joro, marsomba tu Debata.  Laos on do na patudohon Jesus do Malim Na Bolom / Imam Besar sigomgom bagas Joro. Kristus do uluan ni Huria i.
• Angka na angur/na hushus (Mur), dipangke gabe ubat, manang dibahen mamiahi bangke manang angka na mate, (dibalsam) songon na pinatupa Maria magdalena (Markus 16:1), jala on do patuduhon ulaon ni Kristus na ingkon mate humongkop dosa ni jolma i.

Marhite pelean na pinatupa parhapistaran na sian purba i, gabe soso-soso ma i dihita, songon dia do hita pasahaton peleanta tu Debata. Pelean ima tanda hamulaiteon na ta pasahat tu Debata, disaluhut pambahenanna dingolunta.

Ragam do angka pasupasu naung ta jalo, ndada pola sai ingkon marhite angka hinadongan gabe tardok tarpasupasu hita, alai hahipason ni pamatang, denggan ni parsaoran diangka na marhaha anggi, denggan ni relasi natoras tu ianakhon, uli ni parsaoran diparsahutaon, parmargaon, huria, ido angka pasupasu, jala pasupasu na godang ima roha na sonang. Adong do hita manghamuliatehon i tu Debata?

Antong aha do nanaeng sipelehononta tu Debata?

Didok Apostel Paulus di Roma 12:1-2”  Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha. Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.”

 

Huria Ni Tuhanta

Dipangido Debata saluhut ngolunta gabe Pelean na denggan diadopanNa, marhite na mangulahon angka ulaon denggan i, laos angka i do na patuduhon na marparbue do haporseaonta.

Antong Binsan dilehon dope tu hita tingki parasian, unang be hita marsidalian, manang mansohot, manang marsipabalibalian laho patupahon angka na denggan, rade ma rohanta laho manghobasi ulaon ni Debata, ditonga-tonga keluarga, huria nang angka parsaoranta be.  Marsangap ma Debata marhite angka ulaonta. Amen