Jesus do Pintu i

 Tanggal             :               09 Mei 2017

NATS                   :              Johanes 10:1-10

THEMA              :               Jesus do Pintu i / Yesus Adalah Pintu

 

I. Patujolo

                Tung mansai porlu do pintu disada bagas, gabe ndang singkop be bagas i, molo ndang adong dope pintu na. Godang do lapatan manang guna ni pintu, Dalan laho ruar manang bongot, keamanan dohot angka na asing dope. Ala ni i do sai dipatupa do pintu sian hau na undenggan jala na tahan tung pe arga, asa mamparkorhon hadengganon, hasonangan tu pangisi na ala nunga maol molo naeng diungkit angka pangago manang pangago. Jala ndada holan na sian hau na denggan, jot jot do ditambai do pe dohot pintu tambahan sian bosi.

                Molo ta ida di hutanta be, adong do istilah Harbangan. Umpas ni hita “Harbangan do dalan tu huta”, Na boi ta ida disi holan sada do dalan masuk molo naeng nagkok hita tu sada huta mang luat. Ala na biasana huta dibahen do batas na ima parik na balga molo diadaran, bulu dohot dolok. Ido na gabe adong pandohan angka sisuan bulu.

                Tujuanna holan sada dibahen harbangan, asa boi do diboto parhuta i angka ise na ro manang ruar sian huta i. Jala sada huta dipimpin sada Pangituai didok ma on Natuatua ni huta, dihata na asing Ketua Adat, na bertanggung jawab disaluhut angka ulaon paradaton dohot uhum, paturehon angka na masa di luat mang huta i. Jala on do na gabe sisungkunon. Asa molo adong jolma na asing na ro tu huta i ndang sian harbangan bongot didok ma on angka pangago manang pangago.

 

II. Hatorangan ni Turpuk           

                Marhite turpuk on, adong hal-hal na menarik na boi uhal on ta, na gabe di partangiangan ta bodarion ima:

1.            Jesus Kristus do Pintu Haluaon

                Godang do pnadohan ni Tuhan Jesus taringot ise do diriNa. Didok Ibanana do “Panondang ni portibi, Aek Hangoluoan, Roti Hangoluo, Dalan hasintongan dohot hangoluan”.

                Di turpuk ta bodarion didok “ Ahu do pintu i...(ayat 9)”. Sungkunsungkun dihita, Pintu na songon dia, tu dia tujuan na, tu aha pintu i. Molo ta ingot do hata ni Tuhan Jesus Di Johanes 14:2” Torop do inganan di bagas ni Damang...”. Asa boi hita sahat jala bongot tu bagas naung diparade ni Debata, tontu sahali ingkon masuk sian pintu do hita. Hombar tu na ni dok na i, Jesus do Pintu i. Pintu na paloas hita laho bongot tu HarajaoanNa, Jala holan sasadasa do dalan tu hangoluon dohot haluaon. Di paloas, dipatama, dipatalup do hita mandai Aek dohot Roti hangoluani, na pasonanghon tondi ta. Asa hita molo dibagasan Kristus, dapotan :

a.   Haluaon sian dosa ala naung disumeahon diriNa singkat ni dosanta. Holan Ibana do na tuk manggohi saluhut angka patik dohot uhum asa boi malua jolmai, ala ni di namartangiang hita gabe boi ta jou Debata secara langsung ndang songon na masa di padan na robi, marhite angka sintua ni malim do laho martangiang tu Debata.

b.   Pangaramotion, Kristus do na manjaga hita na mangalehon hasonangan tu tondinta. Songon Parmahan na manjaga angka birubiru na, songoni ma Kristus mangalehon diriNa padaohon angka musunta ima rumang ni portibi.

c.   Pangajarion, Ditanda Kristus do hita ala naung dipillit hita gabe anakhon Na, Ibana do dijolonta laho mandalani parngoluonta.

d.   Ngolu ni Partondion na marlobilobi, ala dilehon tu hita haluoan, diramoti, diajari jala disarihon parngoluonta.

 

Ido bagabaga tu angka na olo masuk sian Pintu i, ima Jesus Kristus, Olo do hita manang hot do hita di ruar manang dibagasan roha portibi na soadong jaminan perlindungan tu tondinta?

 

2.            Sikap manang pangalaho Parmahan

                Molo tajaha turpukhon, tung tarida do perbedaan pelayanan manang ulaon ni Parmahan i.  Didok Tuhan Jesus  diayat 8 “Saluhut angka naung manjoloani Ahu, panangko do i jala pamangus; alai ndang ditangihon angka birubiru i nasida.”.  Hata on ndang na mandok tu angka Panghobasion ni angka Panurirang andorang so ro Tuhan Jesus, alai panghobasion ni angka Sintua ni Malim farise dohot Saduki do na dikritik Tuhan Jesus. Tangkas do di ida Tuhan Jesus songon dia pambahenan ni Angka Farise dohot Saduki tu bangso Israel. Ndang diharingrongkothon angka Parise dohot Saduki ianggo parngoluan partondion ni bangso i. Jala na mangharingkothon diri sandiri do dipatupa angka sintua ni malim i. Diperalat do hata ni Debata bahen mangaup paruntungan diri sandiri. Disiali ni i ndang ditangihon angka natorop i angka hata ni sintua ni malim i, i do na umbahen gabe dao bangso i sian Debata, ndang ditanda soara ni Debata.

                Tung mansai andul do Panghobasion manang Parmahanan ni Jesus tu angka na tinompa nai,  Diayat 11, didok Tuhan Jesus “Parmahan na denggan do anggo Ahu...” jala  molo olo hita masuk tu Pintu i, ima Kristus lehonon na do parjampalan, digohi ngolu siapari angka na porsea tung pe adong na godang, adong na otik alai saluhutna marparkorhon las ni roha molo di hamuliatehon, dapotan haluaon dohot hangoluan dohot partondion na mangolu, pangaramotion, pangajaran. Dilehon do diriNa sandiri singkat ni angka pelean na paluahon hita sian dosanta.  Jala marhite on do bo hita mananda manang manangihon soara ni Debata di ngolunta.

                Manghirim do parmahan di angka na diparmahannai. Isara na, molo ta pelihara manuk, nunga taurus denggan, mangkirim do hita asa boi nian buaton ta tolor manang renteng nai, marnahi asa lam godang. Jala on do na dihirim Jesus sian hita naung tinobus nai, asa dung dipatama, dipatalu jala  masuk hita tu habangsaNai, ingkon do adong parbue ta dibagasan ngolunta.             Diayat 9 didok “Paluaon do ganup na bongot sian Ahu”.  On na marlapatan, ndada holan dibagasan rohanta ta tanda ta haporseai Jesus, alai ingkon tarido di bagasan ngolunta.  Tung pe godang angka ragam ni hasusaan, hamaolon, hinsakhinsak na ingkon ta adopi saleleng di portibion alani manghatindangkon haporseaon ta, hatigoran dohot hasintongan na sian Debata, ndang gabe mambahen hita gale. Parmahan na Burju do Kristus, Dijolonta do Ibana, asalma ta pasahat dirinta tu Ibana, didongani Ibana do hita.

                Panghobasion ta Ndada holan tu dongan ta sahaporseaon, alai diangka na so porsea manang so manada Jesus pe ingkon pataridahon, Marhite panghataion na sintong, denggan, pambahenan na denggan, pangarupion tu angka dongan. Asa saluhutna hita na porsea naung manjalo pasupasu sian Debata, ingkon do gabe pasupasu hita ditonga-tonga ni ngolunta, siboan las niroha dihumaliangta.

                Saluhutna hita naung di jou Tuhanta gabe anakhonNa, na gabe parmahan do i.  Parmahan manang parhobas di hita diganup keluargata be (ama/ina na marmudumudhon angka ianakhon), parmahan do hita diangka punguanta be (Pengurus punguan marmudumudu ruas ni punguan), jala parmahan manang parhobas do hita di huria (Parhalado manogunogu ruas), tarlumobi diangka hita naung dipliit Debata gabe Pangula ni Huria i. 

                Tasungkun ma rohanta be, boha do panghobasion ta dinamarmudumudu angka keluargata (Debata do na tapangasahon? , di namangurus punguanta be (Hamaloan ta do na tapangasahon?), di na manghobasi angka ulaon di hurianta (Jabatan ta do ta pangasahon?), Nunga sesuai tu hata ni Tuhanta manang na gabe hadirionta do na tabahen?            

 

III. Reflkesi

                Kristus i do Pintu tu Dalan haluaon dohot hangoluan, jala dipatama, dipatalup do hita bongot tu HarajaonNa, asa boi hita mamaparsaulihon Roti Hanguluan dohot Aek hanguluoni, ido na pabosurhon jala na pamago uas ni partondion ta dihasintongan dohot hatigoran.

                Dipaloas Ibana pe hita mandalani ngolunta on, ndang na dipasompu, Ibana do di jolonta na gabe Panondang , na mangaramoti, manjaga, na mangajari, manarihon ngolunta siapari. Na margogoihon hita mangadapi saluhut angka hasusaan, hamaolon, insakinsak di portbion alani haporseaon ta. 

Hita saluhutna naung dipilit gabe parmahan ditongatonga keluarga, parsaoran, luat, dohot huria Tapataridahon ma Karakter ni Kristus ima na olo berkorban, tigor, sintong, jala mananda angka na pinarmahan nai, asa hita gabe tiruan/teladan parngoluanta.

                Parmahan na denggan mampu mangalehon arah na sintong, rap mardalan dohot manghobasi, jala hundul laho manangihon angka hamaolon jala mangalehon pangurupion manang jalan keluar sian saluhut angka persoalan. Gabe pasu pasu ma hita manang didia pe hita marinagan, mula ulaon dohot manghobasi. Tontu ta rajumi do ndang na tarula hita saluhut nai, molo holan mangsahon goganta, parbinotoan, sinadonganta sambing, alai taingotma Poda ni Raja Salomo di Poda 3:3-6” Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri. Sai Ibana ma tanda di nasa dalanmu, asa Ibana patigor angka dalanmu.” Jala on na pagokhon rohanta mangula nasa ualaon ta dipanggulmit ni ngolunta Johanes 15:5b “Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu.

                Antong hita pasahat ma saluhut panghobasionta, dikeluarga, parsaoran marga tarlumobi huria i, tu Panja Pintu i, Tu Parmahan Na Sun denggan i, Tu Panondang i, Tu Roti dohot Aek Hangoluani, Tu Dalan hasintongan dohot Hatogoran i Ima Tuhan Jesus Kristus, Asa Ibana na paturehon, jala manggohi saluhut na porlu dingolunta, jala marpabue hita dingolunta. Amin