Keselamatan hanya didalam Kristus

TANGGAL             :13 Juli 2016

NAS                        : Kolose 1:1-14

THEMA                 :Dibagasan Kristus Do Adong Haluaon/Keselamatan hanya didalam          Kristus

Patujolo

Molo ta ingot do semboyan ni Bangso Indonesia ima”Bhineka Tunggal Ika” na marlapatan, “Berbeda beda tetapi tetap Satu”, jala on do na tarida di hurianta, hita ro sian ragam ni angka marga, luat na marasing asing, jala adat na berbeda. Kondisi sisongonon do tong na adong di Huria Kolose. Adong do bangso Jahudi, Bangso Yunani, Bangso Frigia dohot angka lan na asing. Alai tarida do hasadaan ni roha ni huria i, jala diparhangoluhon nasida do haulian dohot hadengganon ni ngolu ni haKristenon.

Di pamuhai ni surat Apostel Paulus tu huria Kolose (ayat 1-2), hata “Syalom”, manang Tabe.  Hata tabe on marlapatan na patuduhon las ni roha dohot tanda namasihahongan di angka na porsea. Mamangkulingi angka dongan na sa haporseaon sian ias ni roha dame dohot holong ni roha, jala on do na pataridahon parbue ni haporseaon tu Kristus. Dihilala Apostel Paulus do hinauli ni parsoaran dohot parngoluan partondion ni Ruas Kolose, nang pe ro sian ragam ni angka bangso, alai sada do roha ni huria Kolose mangulahon hata ni Debata. Jala on do na mambahen las ni roha Apostel Paulus.

Turpuk on na gabe sosososo manang na paingoton huria i asa marsihohot mangulahon lomo ni roha ni Debata, tung pe naung toras haporseaon jala denggan ni parsaoran ni huria, asa unang madabu nasida tu ela-ela ni portibion, marhite budaya dohot adat  na marasing na so marhadomuan tu ha Kristen on.

Hatorangan Ni Turpuk

                Marhite turpuk on, naeng diajari jala paingothon hita asa:

1.       Manangiangkon Huria ni Tuhan i, asa marsihohot marpahangoluhon hata ni Debata (Ay 4)

Jotjot do ta bege hata” Tangiang masitangiangan ma hita”, Alai hita  holan managianghon dirinta sandiri, tapangidohon holan asa singkop di lehon Debata bohal ni ngolu ni pardagingon, isarana, hasehaton, angka ulaon ta, ngolu siapari marhite sipanganon dohot si inumon. Sipata ndang taingot manangiangkon angka na sahuria, sahaporseaon. Marhite turpuk on, dipaingot jala diajari do hita asa olo managiangkon angka dongan na sahuria termasuk angka pangula ni hurianta, na sa haporseaoan dohot angka dongan na asing. Molo boi do on gabe kebiasaan ta, lam tubu ma holong jala manada hita di lomo ni Debata.

2.       Haporseaon mamparbuehon, hasintongan, hadengganon ngolu ni partondion dohot marpangkirimon na mangolu. (Ay 5-8)

Molo ta hatidangkon do halak na porsea hita, ingkon tarida do i sian paruluonta siganup ari. Aggo ndang adong pangulaonna doshon tu na mate do haridion na (Jakobus 2: 17, 26)

2:17 Haporseaon i pe songon i do: Anggo so adong pangulaonna, naung mate do hadirionna.

2:26 Ai songon daging i na mate, anggo so martondi; songon i do mate haporseaon na so marulaon.

Dipatudu Huria Kolose do Marhitepambahenan nasida tu angka na badia, dibagasan holong dohot haporseaon. Dipaingot hita asa tarida ma parbue ni haporseaon ta marhite pangulaonta, pambahenan na denggan tu angka dongan.

Jala tubu ma pangkirimon na mangolu di hita, ima panobusion dohot hasesaan ni dosa dohot ngolu na pinatupa Tuhan Jesus. 

3.       Haporseoan ni do na patauhon hita mananda lomo ni roha ni Debata (ay 9-13)

Apostel Paulus pataridahon na so mansohot martangiang tu Huria i. Asa gok pantas ni roha, mananda lomo ni roha ni Debata, marhite hapistaran dohot bisuk ni partondion asa marparenge na tama, jala mamparbuehon hadengganon. Asa marhite panandaion di Debata, gabe margogo, marbenget dohot lambas ni roha jala huhut marlas ni roha.Saluhut na i marlapatan, asa unang muba roha ni Huria i, asa marsihohot jala togu di haporseoan, ndang mangihuthon angka pangajarion na maralo tu lomo ni roha ni Debata.

Marragam do rupa manang cara na pinatupa potibion asa muba roha nang partondiaon ni angka na porsea. Diringkot ni mula ulaon, olo do tarlalap jala ndang diingot be marsaor dohot Debata marhite parmingguon, partangiangan dohot angka lan na asing. Manang mangihuthon hata / ajaran ni angka Motivator, manungkun tu angaka na marhapistaran ni portibi. Angka sisongon do na mambahen ndang dihangoluhon be hata ni Debata. Ta ingot ma “ Ingkon jumolo do hita lului harajaon ni Debata dohot hatigoranNa, dungi dipasahat ma tu hita angka ondeng.

Turpuk on paingot on hita asa marsihohot, mamparngoluhon, marpangunsandean holan tu Debata, jala manghatindanghon pambahenan ni Debata di ngolunta. 

4.       Haluaon holan dibagasan Kristus (ay 14)

Haluaon na marlapatan ima panobusion dohot hasesaan ni dosa. Marhaporseaoan dohot mangulahon lomo ni roha Debata, patalup hita manjalo hasesaan ni dosa dohot pangkirimon di ngolu salelenglengna. Tanda ni naung malua hita sian gongoman ni portibi jala marhaporseaoan na ingkon marparange na denggan, na ture na tama, holong mashiaholongan. Jala saluhut na denggan ni parluaan ingkon sipareahan ta do i. Jala on do na patuduhon parbue ni haporseaon i. Ndang mura hita madabu tu pangajrion manang ela-ela ni portibion.

Sipahusohusoron

Marhite turpuk jamita on dipangido tu hita asa: 

1.       Marsaor na denggan dibagasan holong dohot haporseaon. Tarida ma sian i ndang adong be hosom, teal, elat dohot late ni roha, ala hita sada do dibagsan Tuhan i.

2.       Mangulahon na denggan, tanda ni parbue ni haporseaon ta. Gabe siboan las ni roha ma hita di tongatonga ni keluarga dohot parsaoran ta di huria dohot na humaliangta.

3.       Manongtong hita marpangkirimon di Hangoluan na pinatupa ni Tuhan Jesus. Marpahaporseaon, mangulahaon na denggan hombar tu lomo ni Debata, pareakhon saluhut pambahenan ni Debata on do patalup hita mangkirim di hangoluani.

Amin.

St. E Marpaung