Tapuji Ma Tuhan i

Tapuji Ma Tuhan i / Pujilah Tuhan

 (Psalmen 148:1-6)

Kamis, 05 Juli 2018

I. Patujolo

Hombar tu KBBI, ia lapatan ni Puji (n) ima “Pengakuan dan Penghargaan Yang tulus atas kebaikan (Keunggulan) sesuatu yang dianggap indah gagah berani dsb);

Molo adong donganta na berprestasi ndang segan hita mamuji. taingot do songon dia usaha si Butet Manurung na mangajari angka halak Suku Rimba di Jambi, tontu pinuji ma usaha na binahen nai.

Nang ido na gabe pangkirimon dihita, na mangolu jala na magodang di tano parserahon on, naeng ma nean ngolunta ta on dibagasan haulion dohot hadengganon naboi mamboan silas ni roha na gabe pujian penghargaan ditonga-tongani parsoaran ta na marragami diangka pangantusion, pangalaho, adat istiadat/budaya, haporseaon dohot lan na asing,  ala parulaon dohot pangalaho nadenggan sorminan ni haporseaonta.

Dirajumi Parpsalmen do diturpuk on,  na mangolu ibana dohot bangso nai, ima bangso Israel ditonga-tongani angka bangso na asing, songon bangso Misir, Asyur, Moab dlna. Na marlapatan, Bangso Israel dihaliangi angka bangso na so mananda Jahowa.  Ia Bangso sileban na so mananda Debata, patupa parsomabaonna tu gana-ganaan, marsomba tu mata niari, bulan, bintang, sada contoh, bangso Misir na marsomba tu mataniari, dohot sungai Nil.

Tugas ni bangso i, asa gabe tiruan nasida tu angka bangso na so mananda Jahowa di haporseon dohot pamujiaon tu Jahowa ala saluhut haulion dohot hadengganon na pinatupa Jahowa. Saluhut bangso do marsaulihon, udan, arian, borngin, udara. Ondo na gabe pesan utama diturpukon asa holan Jahowa do sipujion, ndang jadijadiannai. Debata do na manompa saluhutna na diportibion.

Alani i,  diarahan Parpsalmen i asa rap nian, saluhut na tinompa di Jahowa ingkon mamuji jala pasangap Jahowa, unag marsomba tu angka jadi-jadian Na. ala saluhut pambahenan na denggan dohot haulion na pinatupaNa jolma dohot portibion, tarlumobi hita angka naung dipilit Jahowa asa gabe tiruan hita dihumaliangta dohot diangka na so mananda Debata.

II. Hatorangan

Didok Parpsalmen di ayat 2-4, saluhut na tinompa ni Johowa na adong diginjang/langit (suru-suruan, mataniari, bulan, bintang , angka aek na dilangit) ingkon marsomba jala mamuji Jahowa. Debata do na manjadihon i.

Sada kewajiban do di nasa na tinompa laho Mamuji / Pasangap Jahowa. Saluhutna na diportibion dijadihon Jahowa marhite HataNa (FirmanNya).  Alai sumurung do jolma i ditompa Jahowa  Ditompa jolmai sian orbuk ni tano tumiro rupaNa, tudos tupangalahoNa, asa mangaraji angka jadi-jadian ni Debata, jala diullushon do hosa hangoluon asa martondi jolma i (1 Musa 1:26-27, 1 Musa 2:7).

Disialani i ido, ndang adong alasan ni jolmai marsomba / pasahat pamujionna tu na asing sian Jahowa.  Dung madabu jolma i tu dosa, holan lomo ni roha dohot pingkiran ni jolma i na ma dipangke / dipangasahon ndang marhaundukhon be tu Jahowa.

Alai godang do jolma i sahat tu tingki nuaeng on na marsomba/pamujion tu angka na adong dilangit, na porsea tu parhalaan laho mangula siuloan (mangida tingki na lehet), na porsea tu Horoscope/ramalan bintang, na manghaposi angka ramalan garis ni tangan, porsea tu hagogoon ni sihir dohot angka  uti-utian.

Ndada holan i tahe, nunga tung Torop jolmai na mambahen gogona, hapistaran, parbinotoan, huasona, pangkat, hasangapon, hinadongan na gabe Haposanna, manang debatana.  Tung mansai andul do i tu angka na porsea di Jahowa, na mangasahon Jahowa dingoluna.

Tangkas do dipaingot  Parpsalmen, saluhut na diportibion dohot na dilangit, nang jolma i pe, Asa marsomba Tu Jahowa. Unang mangasahon dohot marhaporseaon tu angka jadi-jadian Debata manang marhaposan tu gogo dohot marpangunsadeoan tu pingkiran sandiri, alai saluhutna ingkon pangkeon ni jolmai mamuji Jahowa. Songon naung tajaha di Epistel i, Manang ise na holong roha diperak dohot hamoraon ndang na gabe parsauliani, alai haotoon doi di dok Parjamita.

Sada Ende Pujian na uli, na taendehon ganup parsaoran, dimulai sian rangkaian nada dohot notasi na berubah-ubah. Molo holan sada do notasi na, misalna holan DO, ndang na gabe sada ende nauli i. Alai ala adong notasi na berubah ubah, na dirangkai marhite sada kunci nada, jala denggan diparsiajari, diparrohai tung mansai uli ma anggo ende i begeon.

  Songoni do nang portibion, adong do arian, borngin, ari parudan, musim na muba-ubah, saluhutna na patuduhon sada proses naung diatur Jahowa tu hadengganon ni nasa natinompa na.

Songon Ende i do nang parngoluonta. Ndang dos ganup ari na tadalani jala ndang sarupa tu angka donganta.  Sipata tonggi do ta hilala, sipata paet.  Marganti soring, jala ingkon adopan jala hilalaan ta do saluhutnai, holan partingkian dohot tingkatanna do na mambedahon.  Asa marhite saluhut na masa dingolunta on, na paet pe i, na tonggi pei, tarajumi dibagasan haporseaon ondo na gabe sade ende panindangion pamujion tu Jahowa dingolunta. Ala dihaholongi jala diramoti hita.

Tabereng ma,  Ganup manogot do Tarbege taguak ni manuk, paboahon nunga torang ari, nunga ro ari naimbaru, asa dungo jolma i.  On do contoh pamujion ni angka dorbia tu Debata, ndada holan tu dirini dorbia i sambing, alai dohot do taruli angka na dihumaliangga.  Nang hita pe, ingkon do pamujion ta(Penghormatan/pasangaphon) tu Jahowa marguna ndada halan tu dirinta sandiri, alai dohot ma angka humaliangta manghilala hinadenggan ni pamujionta tu Jahowa.

III. REFLEKSI

Songon dia do sikap angka na porsea mamuji/pasangaphon / menghormati Debata. Boi do sungkunonta dirinta be, nunga songon dia pardalanan ni ngolungta, hombar tu lomo Na do? manang mandao sian patik Nai?.  Ngolunta ta do bukti Pumujian tu Jahowa.

Cukup do hita holan marende puji-pujian sian buku ende dijabu/partangiangan manang di garejai?, On do ma nargoar Pujian Tu Jahowa?. NDANG I. Denggan pe hita mangendehon ende puji-pujiani molo holan dipangamanta, ndang marlapatani molo so mangolu do endei di rohanta. Dos do tu sada Drum na kosong, na marsaringar suarana, hape ndang adong isi na.

Jadi songon dia do hita mamuji Jahowa. Hombar tu Patik na. Didok Tuhan Jesus di (Mat 22:37, Luk10:27) Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim! .  

Holong tu Debata do dalan pamujion di GoarNa. Ido sarat na parjolo.  Pamujion tu Debata tubu sian roha na mananda Debata. Mananda Debata marlapatan manghamulaitehon saluhut denggan ni basaNai, dohot na mangaradoti patik/uhum Na. Ndang boi hita mamuji Debata molo so tatanda jala tahaholongi Ibana. Dibagasan Panandaon di Jahowa, adong ma haholongan, haporseaon, dohot pangkirimon tu Jahowa. Holong tu Debata pasupasu jala basabasa do i di hita. 

Saluhut Ngolunta on, holan ala asi ni roha dohot denggan basa ni Tuhan ido. Ndada holan dibagasan ate-ate/rohanta hita manghalolongi Jahowa, alai Sandok sahulut hadirionta, ima roha, pangalaho, ulaon, panghataion, pangalangka ingkon pangkeonta laho mamuji dohot pasangaphon Debata, marhite angka ulaon na tigor,  nasintong dohot na denggan.  Ima tanda naung tubu haporseaonta, jala mian hita dibagasan holong ni Debata.

Ndang holan i tahe, Pamujion/Pasangaphon Jahowa tarida doi diparsaoranta dihumaliang ta.  Molo ta dok tahaholongi jala ta pasangap  Debata alai ndang adong holong rohanta tu donganta, pargabus do hita disi. 1 Joh 4:20 “Pargabus do halak na mandok: Holong rohana di Debata; hape dihosomi do donganna. Hata ni Debata mandok, sian parbue na do tandaon hauna (Mat 12;33). Jadi tarida do pamujion na denggan, na marsitutu tu Jahowa, sian angka pambahenanna diparngoluonna.

Jala on do na diarahon Parpsalmen, asa na porsea naung manghilala denggan basa ni Jahowa jala na manghamulaitehon i dingoluna, rap marpungu, rap mamuji dohot pasangaphon Jahowa dibagasan huria i. Ido umbahen dipatupa Parmingguon tu angka na porsea. Tontu adong dasar boasa hita ingkon Marminggu, manang dipatupa partangiangan. Tangkas do di paboa di 2 Musa 20:11 ondo na gabe Patik IV,  3 Musa 23:3 (ari parluhutan na badia). Ra ditorop huria, bilangan ni naro tu parmingguon dohot partangiangan pe nunga moru, ala ragam ni ulaon dohot alasan. Jala adong sada Ilustrasi:”Galas na so use”,  dohot tungku perapian dengan bara / arang api.  “ Di botari nai mardalni ma

sintuai manopot ruasna naung leleng ndang ro tu parmingguon /partangianang, jumpa nasida ma ruas nai sedang mambakar sampah/ranting dialaman nai jala manghatai ma nasida. Disungkun ma aha do ulaning na soa hea be ro tu parmingguon, dialusi ma didok ma alsanna,. Jadi dipangido sintuami sagalas aek disuru mamanghaliangi jabuna 3 hali, ndang boi use. Dungi diceritahon ma lapatna ni galas dohot pambakaran ni sampa nai.

Ia pesan sian ilustrasi i, jotjot do hita holan marnida, rupa, manang hahurangan baik donganta, pelayanan/panghobasion ni parhalado, marende na hurang dlna. Na mambahen losok rohanta ro tu parsaoran ni huria. Molo ido sipeophon ni rohanta  tung na soadong boi idaanta, hilalaonta, na denggan sian i, ala holan hahuranganni do na taida. Ndang adong na singkop, na sempurna jolma i suang songoni angka pangula i, tongtong do hita torus rap marsiajar laho padimundimun dohot padengganhon hadirionta asa hombar tu lomo ni roha ni Debata.

Molo hita boi menilai hahurangan ni donganta, donganta i pe bo i menilai hahuranganta. Jala na ringkot dison, Songon Galas na so Use, ima Fokus manang Konsentrasi ta laho mamuji/pasangaphon Debata dihuriai, manang dipartangiangani.  Unang ma nean mulak hita sian sada Parmingguon/ partangiangan ndang martamba pangantusion tu hata ni Debata, baliksa gabe mamboan dosa hita sian parpunguanni, ala holan marnida hahurangan ni. Tung mansai ringkot do hita marsaor dohot dohot sahaporseaon di Parmingguan dohot partangiangan.

  Pamujion tu Jahowa berkaitan do i tu na marbarita nauli. Tugas angka na porsea do i, Marbarita nauli ndang holan na Marjamita, lobi sian i, ima na marparhangoluhon hata ni Debata di ngoluna siapari, na gabe siboan las ni roha, dame, haholongan ditongatonga ni parsaoran.  On on hataridaan ni Barita Nauli i, na langsung dihilala roha. Jala on do gabe Pamijion Na sintong tu Jahowa . Ngolunta dohot hadirionta gabe Pujion di Jahowa.

Angtong, Songon Parpsalmen na paingothon asa Rap Saluhut na tinompa mamuji dohot pasangaphon Jahowa nang hita pe asa dibagasan haringgason, na masihol marsaor dohot Debata rap dohot angka dongan sahaporseaon. Mamuji pasangap Ibana marhite hadirionta, disiala Haulion dohot hadengganon na Pinatupa ni Jahowa. Hombar tu lomo ni rohaNa, dilehon tu hita saluhut na ringkoti dingolunta. taparhaseang jala ta pangke ma tingki dohot saluhut hadirion ta, ngolunta on gabe ulaulaNa laho mamuji Tuhan i marhite pangalaho, pambahenan na sintong, na tigor dohot na denggan i, hataridaan jala parbue ni haporseaonta i di ganup parsaoranta na marragam i. Dipasupasu jala diajari Debata ma hita mangulahon hataNa i. Amen .

St. E. Marpaung